ठाणे (वार्ताहर): ठाणे शहरातील काही भागात बुधवार ते गुरुवार पाणी पुरवठा बंद राहणार आहे.
ठाणे महानगरपालिकेच्या पिसे उदंचन केंद्रातील जॅकवेलमधील कचरा, गाळ काढण्यासाठी व टेमघर शुद्धीकरण केंद्रामधील तसेच शहरातील विविध ठिकाणी तातडीने देखभाल व दुरुस्तीची कामे करण्याकरीता शटडाऊन घेण्यात येणार आहे.
या शटडाऊनमुळे बुधवार दिनांक १५ डिसेंबर रोजी सकाळी ९ ते गुरुवार दिनांक १६ डिसेंबर रोजी सकाळी ९ वाजेपर्यंत ठाणे शहरातील इंदिरानगर, श्रीनगर, लोकमान्यनगर, रामनगर, डिफेन्स, किसननगर, घोडबंदर रोड, पातलीपाडा, हिरानंदानी इस्टेट, समतानगर, आकृती, सिद्धेश्वर, जॉन्सन, ईटरनिटी, ब्रम्हांड, विजयनगरी, गायमुख, बाळकुम, कोलशेत, आझादनगर या भागात पाणी पुरवठा बंद राहील. तसेच बुधवार रात्री ९ ते गुरुवार सकाळी ९ वाजेपर्यंत ऋतु पार्क, जेल, साकेत, रुस्तमजी, कळवा व मुंब्रा परिसरातील काही भागात पाणी पुरवठा बंद राहणार आहे.
या शटडाऊनमुळे पाणी पुरवठा पूर्व पदावर येईपर्यंत पुढील एक ते दोन दिवस कमी दाबाने पाणी पुरवठा होणार असून, नागरिकांनी पाण्याचा योग्य तो वापर करून पालिकेस सहकार्य करावे, असे आवाहन पाणी पुरवठा विभागाने केले आहे