Thursday, July 18, 2024
Homeमहत्वाची बातमीजिल्हा परिषद आणि नगरपंचायतींची निवडणूक सरसकट स्थगित करा

जिल्हा परिषद आणि नगरपंचायतींची निवडणूक सरसकट स्थगित करा

भाजपच्या शिष्टमंडळाची निवडणूक आयोगाकडे मागणी

मुंबई (विशेष प्रतिनिधी) : भंडारा व गोंदिया जिल्हा परिषद व त्याअंतर्गत १५ पंचायत समित्या तसेच १०६ नगरपंचायतींमध्ये केवळ ओबीसींच्या जागांवरील निवडणूक प्रक्रिया स्थगित करून उर्वरित जागांवर निवडणूक घेण्याचा निर्णय राज्य निवडणूक आयोगाने घेतला आहे. यामुळे गंभीर पेच निर्माण होतील. हे ध्यानी घेऊन आयोगाने ही निवडणूक सरसकट स्थगित करावी, अशी मागणी बुधवारी भाजपचे आ. आशीष शेलार, आ. कॅप्टन तमिळ सेल्वन व आ. राजहंस सिंह यांच्या शिष्टमंडळाने राज्य निवडणूक आयुक्त यू. पी. एस. मदान यांच्याकडे केली.

भाजप प्रदेशाध्यक्ष चंद्रकांत पाटील यांनी राज्य निवडणूक आयुक्तांना निवेदन पाठविल्यानंतर पक्षाच्या शिष्टमंडळाने आयुक्तांची भेट घेतली. आशीष शेलार यांच्या नेतृत्वाखाली भाजपाचे शिष्टमंडळ राज्य निवडणूक आयुक्तांना भेटले व त्यांना पक्षातर्फे निवेदन सादर केले. ओबीसींच्या राखीव जागांची निवडणूक स्थगित करून इतर जागांसाठी निवडणूक घेण्याच्या आयोगाच्या निर्णयामुळे असमतोल निर्माण होत असून सामाजिक, राजकीय व संवैधानिक पेच निर्माण होत आहे, असे या शिष्टमंडळाने आयुक्तांच्या निदर्शनास आणले.

ओबीसी राखीव वगळून उर्वरित जागांची निवडणूक घेण्यामुळे ओबीसी आरक्षित २७ टक्के मतदारसंघातील (वॉर्ड अथवा गट अथवा गण) मतदार निवडणूक प्रक्रियेपासून वंचित राहतात. इतक्या मोठ्या प्रमाणात नागरिकांना निवडणूक प्रक्रियेपासून दूर ठेवणे, पण इतरांना संधी देणे हे संविधानातील समानतेच्या तत्त्वाशी विसंगत आहे, असे या शिष्टमंडळाने निवेदनात म्हटले आहे.

ओबीसींच्या आरक्षणाचा निर्णय कधी होईल, तो कधी लागू होईल व त्यानुसार कधी निवडणूक होईल याबद्दल अनिश्चितता आहे. अशा स्थितीत ही निवडणूक अनिश्चित काळासाठी स्थगित ठेवणार का, ओबीसी अनिश्चित काळासाठी प्रतिनिधित्वापासून वंचित राहणार का, असे प्रश्न निर्माण झाल्याचे निवेदनात म्हटले आहे.

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra

RELATED ARTICLES
- Advertisment -

Most Popular

- Advertisment -