दोन इंजिनचे सरकार असताना काम दुप्पट वेगाने होते : पंतप्रधान मोदी

गोरखपूर (वृत्तसंस्था) : केंद्र आणि उत्तर प्रदेशातील भारतीय जनता पक्षाचे सरकार दोन इंजिनांसारखे आहे, त्यामुळे ते दुप्पट वेगाने विकासकामे करत आहे, असं प्रतिपादन पंतप्रधान नरेंद्र मोदी यांनी गोरखपूरमध्ये एका उद्घाटन कार्यक्रमात केले.

शुद्ध हेतूने काम केले जाते, त्यावेळी संकटंही आपल्याला अडवू शकत नाहीत. गोरगरीब, वंचित, शोषितांची काळजी करणार सरकार असते, तेव्हा ते देखील जोमाने काम करतात. त्या सरकारला पुन्हा निवडून आणतात, असे मोदी म्हणाले. मी पाच वर्षांपूर्वी एम्स रुग्णालय आणि खतांच्या कारखान्याच्या पायाभरणी समारंभासाठी आलो होतो. या दोन्ही गोष्टींचं उद्घाटन करण्याचं भाग्य मला आज मिळालं. आयसीएमआरच्या रिजनल मेडिकल रिसर्च सेंटरला नवी इमारतही आज मिळाली आहे. मी उत्तर प्रदेशच्या नागरिकांचं अभिनंदन करतो, असे मोदींनी पुढे म्हटले.

उत्तर प्रदेशातील गोरखपूरमध्ये पंतप्रधान नरेंद्र मोदी यांनी ९,६०० कोटींहून अधिक खर्चाच्या विकासकामांचं उद्घाटन केले. यावेळी राज्यपाल आनंदीबेन पटेल आणि उत्तरप्रदेशचे मुख्यमंत्री योगी आदित्यनाथही उपस्थित होते. यावेळी त्यांनी गोरखपूरमधल्या विकास प्रकल्पांच्या प्रदर्शनाला भेट दिली. त्यानंतर त्यांनी गोरखपूर फर्टिलायझर प्लांट, एम्स गोरखपूर आणि आयसीएमआर- रिजनल मेडिकल रिसर्च सेंटरचं उद्घाटन केले.