नवी दिल्ली : रमजानचा महिना संपत आला असून आता भारतात ‘ईद’ अर्थात ईद-उल-फित्र कधी साजरी करणार याकडे सर्वांचे लक्ष लागले आहे.
रमजानच्या महिनाभराच्या उपवासानंतर, जगभरातील मुस्लिम नवीन चंद्र दिसण्याची, ज्याला चांद रात म्हणतात, आतुरतेने वाट पाहत आहेत. चंद्र दिसल्यानंतर ईद साजरी करण्यात येते.
त्याआधी ईद उल फित्रची सामूहिक नमाज शनिवारी सकाळी होणार आहे. लखनौच्या इस्लामिक सेंटर ऑफ इंडियाने नमाजची वेळ जारी केली आहे. जामा मशीद इदगाह येथे दुपारी १२.४५ वाजता नमाज अदा होईल. त्याचवेळी मौलाना सैफ अब्बास यांनी सांगितले की, मस्जिद अबूतालिब आणि आसिफी मशिदीमध्ये दुपारी १२.१० वाजता नमाज अदा होणार आहे.
ईदसाठी घराघरांत जय्यत तयारी झाली आहे. ईदची तारीख चंद्र दर्शनावर अवलंबून असल्याने २१ एप्रिलला चंद्र दिसला तर ईदचा आनंद २२ एप्रिलला साजरा होईल. चंद्र न दिसल्यास २३ एप्रिलला ईद असेल. भारतात ईद-उल-फित्र २२ तारखेला साजरी केली जाईल, असे इंडिया युनियन मुस्लिम लीगचे राज्य अध्यक्ष सय्यद सादिक अली शिहाब थांगल यांनी सांगितले.
ईद-उल-फित्र २२ एप्रिल रोजी साजरी करणार
इंडिया युनियन मुस्लिम लीगचे राज्य अध्यक्ष सय्यद सादिक अली शिहाब थांगल यांनी गुरुवारी शव्वाल चंद्रकोर चंद्र दिसला नसल्याचे नमूद केले. याचा अर्थ मुस्लिमांना आणखी एक दिवस उपवास ठेवावा लागेल आणि २२ एप्रिल रोजी शुभ सण साजरा करावा लागेल.
सौदी अरेबियात शुक्रवारी तर पाकिस्तानमध्ये शनिवारी ईद-उल-फित्र साजरी करणार
भारताप्रमाणेच पाकिस्तानमधील इस्लामाबादमध्ये घोषणा केली की शनिवारी ईद उल-फित्र साजरी केली जाईल. सौदी अरेबियाने शुक्रवारी ईद-उल-फित्र साजरी करण्याची घोषणा केली. संयुक्त अरब अमिराती आणि कतार यांनी जाहीर केले की त्यांच्यासाठी शुक्रवारी सुट्टी सुरू होईल, तर त्यांचे आखाती अरब शेजारी ओमानने घोषित केले की चंद्र दिसला नाही आणि सुट्टी शनिवारपासून सुरू होईल. युएई मध्ये लोकांना ईद साजरी करण्यासाठी ४ दिवसांची सुट्टी देण्यात आली आहे.