जपानमध्ये पुन्हा एकदा भूकंपाचे तीव्र धक्के जाणवल्याने नागरिकांमध्ये भीतीचे वातावरण पसरले आहे. रविवारी पहाटे जपानच्या मध्य भागात रिश्टर स्केलवर 5.7 तीव्रतेचा शक्तिशाली भूकंप नोंदवला गेला. जपानी माध्यमांच्या वृत्तानुसार, या भूकंपाच्या जोरदार झटक्यांमुळे अनेक जण जखमी झाले असून, जखमींची संख्या डझनावारी असल्याचे समोर येत आहे.

कुठे होता भूकंपाचा केंद्रबिंदू?

जपानच्या हवामानशास्त्र संस्थेने (JMA) दिलेल्या अधिकृत माहितीनुसार, हा भूकंप स्थानिक वेळेनुसार पहाटे 1 वाजून 4 मिनिटांनी झाला. या भूकंपाचा केंद्रबिंदू शिजुओका प्रांताच्या पश्चिम भागात जमिनीखाली सुमारे 40 किलोमीटर खोलीवर होता. जपानच्या कठोर भूकंप तीव्रता मापन पद्धतीनुसार, आयची प्रांतातील चिता परिसरात भूकंपाची तीव्रता 5 च्या वरच्या स्तरावर नोंदवण्यात आली. तसेच, आयची, नागानो आणि गिफू प्रांतांतील काही भागांत 5 च्या खालच्या स्तरावरील धक्के जाणवले. यावरून मध्य जपानमधील मोठ्या भूप्रदेशाला या भूकंपाचे मोठे धक्के बसल्याचे स्पष्ट झाले आहे.

मुख्य भूकंपाच्या धक्क्यानंतर काही लहान आफ्टरशॉक्स (लहान धक्के) देखील जाणवले, ज्यामुळे नागरिकांमधील धाकधूक आणखी वाढली. घटनेची गांभीर्य लक्षात घेऊन जपान सरकारने त्वरित पावले उचलली आहेत. प्रभावित भागांतील तातडीची परिस्थिती समजून घेण्यासाठी आणि मदतकार्याचा योग्य समन्वय साधण्यासाठी प्रशासनाकडून आपत्कालीन संपर्क कार्यालय स्थापन करण्यात आले आहे.

https://www.prahaar.in/2026/11/08/yemen-airstrikes-saudi-attack-kills-33-people-including-13-children-sanaa-province-conflict/

त्सुनामीचा धोका टळला

स्थानिक नागरिकांसाठी एक दिलासादायक बाब म्हणजे, या भूकंपानंतर त्सुनामीचा कोणताही धोका निर्माण झालेला नाही, असे जपानच्या हवामानशास्त्र संस्थेने स्पष्ट केले आहे. प्रशासनाकडून सध्या संपूर्ण परिस्थितीवर अत्यंत बारकाईने लक्ष ठेवले जात असून, आपत्कालीन यंत्रणेमार्फत जखमींवर तातडीने योग्य उपचार सुरू आहेत. जपानमध्ये वारंवार होणाऱ्या भूकंपांमुळे येथील सुरक्षा यंत्रणा नेहमीच सतर्क असते, ज्यामुळे मोठी जीवितहानी टळली आहे.