दिवाळी आणि भाऊबीज सणाच्या पार्श्वभूमीवर रेल्वे प्रवाशांसाठी मध्य रेल्वेने महत्त्वाचा निर्णय घेतला आहे. सणासुदीच्या काळात प्रवाशांची वाढती गर्दी लक्षात घेऊन भुसावळ विभागातर्फे भुसावळ ते देवळालीदरम्यान चार विशेष अनारक्षित मेमू रेल्वे फेऱ्या चालविण्यात येणार आहेत. १० आणि ११ नोव्हेंबर २०२६ रोजी ही विशेष रेल्वेसेवा उपलब्ध राहणार आहे. त्यामुळे जळगाव, पाचोरा, चाळीसगाव, मनमाड आणि नाशिक परिसरातील प्रवाशांना मोठा दिलासा मिळणार आहे.

भुसावळहून सकाळी ९.१५ वाजता सुटणार गाडी

रेल्वे प्रशासनाने दिलेल्या माहितीनुसार, विशेष अनारक्षित मेमू रेल्वे क्रमांक 01072 ही १० आणि ११ नोव्हेंबर रोजी भुसावळ स्थानकावरून सकाळी ९.१५ वाजता रवाना होईल. ही गाडी त्याच दिवशी दुपारी १.०५ वाजता देवळाली स्थानकावर पोहोचणार आहे. परतीच्या प्रवासासाठी विशेष मेमू रेल्वे क्रमांक 01071 ही १० आणि ११ नोव्हेंबर रोजी देवळाली स्थानकावरून दुपारी १.३० वाजता सुटेल. त्याच दिवशी सायंकाळी ५ वाजता ही गाडी भुसावळ स्थानकावर पोहोचणार आहे.

या स्थानकांवर मिळणार थांबा

भुसावळ-देवळाली विशेष मेमू रेल्वेला प्रवाशांच्या सोयीसाठी पुढील स्थानकांवर थांबे देण्यात आले आहेत. जळगाव, पाचोरा, चाळीसगाव, नांदगाव, मनमाड,लासलगाव, नाशिक रोड, देवळाली या विशेष मेमू रेल्वेला एकूण १२ मेमू कोच असणार आहेत.

https://www.prahaar.in/2026/11/07/nashik-kumbhmela-a-major-plan-by-the-railways-for-the-simhastha-kumbh-mela-24-special-trains-to-run-five-railway-stations-in-nashik-to-undergo-a-transformation/

वेळापत्रक आणि प्रवाशांसाठी महत्त्वाची सूचना

विशेष रेल्वेच्या सर्व स्थानकांवरील आगमन आणि प्रस्थानाच्या सविस्तर वेळा जाणून घेण्यासाठी प्रवाशांनी भारतीय रेल्वेच्या अधिकृत वेबसाइटला भेट द्यावी. वेबसाइट: https://www.enquiry.indianrail.gov.in तसेच NTES (National Train Enquiry System) ॲपच्या माध्यमातूनही रेल्वेचे वेळापत्रक आणि थांब्यांची माहिती मिळू शकते.

सणासुदीच्या गर्दीत प्रवाशांना दिलासा

दिवाळी आणि भाऊबीज निमित्त अनेक नागरिक नातेवाईकांकडे जाण्यासाठी रेल्वे प्रवासाला प्राधान्य देतात. त्यामुळे नियमित रेल्वेगाड्यांमध्ये मोठी गर्दी निर्माण होते. ही गर्दी नियंत्रित करण्यासाठी मध्य रेल्वेच्या भुसावळ विभागाने विशेष मेमू सेवा सुरू करण्याचा निर्णय घेतला आहे. या चार विशेष फेऱ्यांमुळे भुसावळ ते देवळालीदरम्यान प्रवास करणाऱ्या हजारो प्रवाशांना अतिरिक्त रेल्वे सुविधा उपलब्ध होणार असून, सणासुदीचा प्रवास अधिक सोयीस्कर होण्यास मदत मिळणार आहे. प्रवाशांनी या विशेष रेल्वेसेवेचा लाभ घ्यावा, असे आवाहन रेल्वे प्रशासनाने केले आहे.