मुंबई : देशातील आतापर्यंतचा सर्वात मोठा 30,213 कोटी रुपयांचा जिओ प्लॅटफॉर्म्सचा आयपीओ दुसऱ्या दिवशीही शेअर बाजारात धुमाकूळ घालत आहे. गुंतवणुकदारांनी या महा-आयपीओमध्ये पैसे ओतण्यासाठी अक्षरशः झुंबड उडवली आहे. सकाळी 10:18 पर्यंत हा इश्यू एकूण 3.3 पट सबस्क्राइब झाला असून, संस्थात्मक आणि किरकोळ गुंतवणूकदारांचा वाढता प्रतिसाद पाहता जिओने बाजारात नवा विक्रम प्रस्थापित केला आहे.

दुसऱ्या दिवशी जोरदार प्रतिसाद आणि सब्सक्रिप्शनचा वेग

जिओ प्लॅटफॉर्म्सच्या या मेगा इश्यूला पहिल्या दिवसाप्रमाणेच दुसऱ्या दिवशीही तुफान प्रतिसाद मिळाला आहे. संस्थात्मक गुंतवणूकदारांचा (QIB) आरक्षित कोटा 9.42 पट भरला आहे, तर रिटेल गुंतवणूकदारांच्या भागा 92% पर्यंत पोहोचला आहे. विशेष म्हणजे, पहिल्या दिवशी रिटेल गुंतवणूकदारांचा सहभाग केवळ 73% होता, जो आता वेगाने वाढताना दिसत आहे. कंपनीने अँकर गुंतवणूकदारांकडून आधीच 8,110 कोटी रुपयांचा मोठा निधी उभा केला आहे, ज्यामुळे बाजारातील कंपनीचा पाया अधिक मजबूत झाला आहे.

https://www.prahaar.in/2026/10/21/strong-response-to-jio-platforms-ipo-on-the-very-first-day-fully-subscribed-within-two-hours/

ग्रे मार्केटमधील (GMP) घमाका आणि संभाव्य नफा

ग्रे मार्केटमध्ये जिओच्या शेअर्सची जोरदार चर्चा सुरू असून उत्साह कायम आहे. आज सकाळी जिओ आयपीओचा GMP (ग्रे मार्केट प्रीमियम) ₹246 वर ट्रेड करत होता. इश्यूच्या वरच्या किंमत पट्ट्यापेक्षा (₹1,119) हा सुमारे 22% प्रीमियम मानला जात आहे. यानुसार, शेअर्सची अंदाजे लिस्टिंग किंमत ₹1,365 च्या आसपास निघू शकते. जर तुम्ही 12 शेअर्सचा एक लॉट घेतला, तर तुम्हाला पहिल्याच दिवशी अंदाजे ₹2,952 चा भरघोस फायदा होऊ शकतो. जरी 20 ऑक्टोबरला GMP ₹273 होता आणि त्यात किंचित घसरण झाली असली, तरी एकूण ट्रेण्ड कमालीचा पॉझिटिव्ह आहे.

https://www.prahaar.in/2026/10/16/major-decision-by-reliance-jio-ipo-price-band-announced-with-special-benefits-for-shareholders/

महत्त्वाची तारीख आणि गुंतवणूकदारांसाठी सल्ला

या आयपीओची किंमतपट्टी ₹1,065 ते ₹1,119 दरम्यान निश्चित करण्यात आली आहे. हा बहुचर्चित इश्यू उद्या शुक्रवारी (23 ऑक्टोबर) बंद होत असून, याचे शेअर्स मार्केटमध्ये 28 ऑक्टोबरला लिस्ट होणे अपेक्षित आहे. दरम्यान, तज्ज्ञांच्या मते, ग्रे मार्केट प्रीमियम (GMP) हा पूर्णपणे अनधिकृत अंदाज असतो, त्यामुळे कोणताही मोठा आर्थिक निर्णय घेण्यापूर्वी आपल्या अधिकृत आर्थिक सल्लागाराशी आवर्जून चर्चा करा.