बोगोटा : नारिन्यो भागात घडलेल्या या दुर्घटनेने पुन्हा एकदा अवैध खाणकामांचा धोका आणि तिथल्या भीषण वास्तवावर प्रकाश टाकला आहे. इक्वेडोरच्या सीमेलगत असलेल्या या भागात सशस्त्र गटांचा मोठा सुळसुळाट असून, ते सोन्याचा अवैध व्यापार आणि अमली पदार्थांच्या तस्करीवर नियंत्रण ठेवतात. भौगोलिक परिस्थिती अत्यंत कठीण असल्याने आणि गुन्हेगारी गट सक्रिय असल्यामुळे बचाव पथकांना घटनास्थळी पोहोचण्यासाठी मोठ्या अडचणींचा सामना करावा लागला. स्थानिकांच्या मते, पोटाची खळगी भरण्यासाठी अशा अत्यंत धोकादायक कामांशिवाय या भागातील नागरिकांसमोर दुसरा कोणताही पर्याय उरलेला नाही, ज्यामुळे निष्पाप लोकांचे जीव जात आहेत.

खाणकामाचा गड बनलेला नारिन्यो आणि प्रशासनाचे अपयश

कोलंबियाच्या नैऋत्य भागातील नारिन्यो हे बेकायदा खाणकामाचे प्रमुख केंद्रबिंदू बनले आहे. येथे सरकारी नियम आणि कायद्यांची कोणतीही प्रभावी अंमलबजावणी होत नसल्याने खाण दुर्घटना वारंवार घडत असतात. समाजमाध्यमांवर प्रसारित झालेल्या एका थरारक व्हिडिओमध्ये काही नागरिक आणि उत्खनन यंत्राच्या सहाय्याने खाणीतून मृतदेह बाहेर काढून जवळच्या नदीतील छोट्या बोटीत ठेवले जात असल्याचे दिसून आले. दरम्यान, ढिगाऱ्याखाली अडकलेल्या जिवंत व्यक्तींचा शोध घेण्याचे काम आता थांबवण्यात आल्याची माहिती नारिन्योचे शांतता आणि सुरक्षा सचिव ॲलेक्स गोंझालेझ यांनी दिली आहे. प्रशासनाच्या या भूमिकेमुळे स्थानिकांमध्ये तीव्र संताप व्यक्त होत आहे.

https://www.prahaar.in/2026/10/19/putin-proposes-trilateral-summit-trump-xi-jinping-russia-ukraine-war/

दहशतीच्या छायेखाली स्थानिक रहिवासी

केवळ दुर्घटनाच नव्हे, तर या भागात गुन्हेगारी गटांची प्रचंड दहशत पसरली आहे. ज्या नगरपालिकेत ही खाण कोसळली, तेथील स्थानिक रहिवाशांनी दिलेल्या माहितीनुसार, सशस्त्र गटांनी काही व्यक्तींच्या निवडक हत्या केल्या आहेत. हे मृत किंवा पीडित लोक सुरक्षा दलांच्या अथवा प्रतिस्पर्धी संघटनांच्या संपर्कात असल्याचा संशय होता, किंवा त्यांनी सोने चोरल्याचा आरोप ठेवून ही टोकाची कारवाई करण्यात आली. एकीकडे बेकायदा खाणींचे जीवघेणे संकट आणि दुसरीकडे सशस्त्र गटांची खुली दहशत, यामुळे येथील सामान्य नागरिकांचे जगणे अक्षरशः नर्कसमप्राय बनले असून यावर तातडीने कठोर पावले उचलण्याची गरज निर्माण झाली आहे.