हैदराबाद : रणजी ट्रॉफी 2026-27 च्या हंगामाची सुरुवात हैदराबाद संघाने अत्यंत दणदणीत आणि शानदार पद्धतीने केली आहे. स्टार वेगवान गोलंदाज मोहम्मद सिराज याच्या नेतृत्वाखाली खेळणाऱ्या हैदराबादने त्रिपुराचा एक डाव आणि 40 धावांनी दारूण पराभव केला. या विजयासह हैदराबादने नव्या हंगामात आपली मजबूत दावेदारी सिद्ध केली आहे.

तिसऱ्या दिवशी त्रिपुराचा डाव पत्त्याच्या बंगल्यासारखा कोसळला

सामन्याच्या तिसऱ्या दिवशी मंगळवारी त्रिपुराचा संघ पुढे खेळण्यासाठी उतरला. दुसऱ्या दिवशी त्यांची धावसंख्या 107 धावांवर 7 गडी बाद अशी बिकट होती. आजच्या सत्रात हैदराबादच्या गोलंदाजांनी उर्वरित फलंदाजांना अगदी कमी वेळात बाद केले. त्रिपुराचा संपूर्ण संघ दुसऱ्या डावात अवघ्या 120 धावांवर ऑलआऊट झाला. यादरम्यान त्रिपुराने केवळ 6.2 षटकांत आपल्या अखेरच्या 3 विकेट्स गमावल्या.

तनय त्यागराजनची भेदक गोलंदाजी (9 विकेट्स)

या सामन्याच्या विजयाचा खरा हिरो डावखुरा फिरकी गोलंदाज तनय त्यागराजन ठरला. त्याने आपल्या फिरकीच्या जाळ्यात त्रिपुराच्या फलंदाजांना अडकवत सामन्यात एकूण 9 बळी टिपले. पहिल्या डावात त्रिपुराचा डाव 134 धावांवर संपुष्टात आला होता, ज्यामध्ये हैदराबादने प्रत्युत्तरात पहिल्या डावात 294 धावा करून मोठी आघाडी घेतली होती. दुसऱ्या डावात तनय त्यागराजनने तब्बल 6 विकेट्स घेत विजयावर शिक्कामोर्तब केले.

https://www.prahaar.in/2026/10/13/if-get-out-this-way-now-its-not-bowled-the-cricket-rule-has-changed-understand-how/

सिराज आणि पदार्पण करणाऱ्या रुथिकचे महत्त्वपूर्ण योगदान

कर्णधार मोहम्मद सिराजने पहिल्या डावात कोणतीही विकेट घेतली नसली, तरी दुसऱ्या डावात कडक मारा करत 2 महत्त्वाचे फलंदाज बाद केले. याशिवाय, हैदराबादच्या पहिल्या डावात तन्मय अग्रवाल आणि पदार्पण करणारा फलंदाज रुथिक यादव यांनी झळकावलेली अर्धशतके संघासाठी अत्यंत महत्त्वाची ठरली. शेवटच्या सत्रात सेंटू सरकार आणि परवेझ सुलतान यांनी काही वेळ संघर्ष केला, परंतु तो अपुरा ठरला.

या दणदणीत विजयामुळे हैदराबाद संघाने रणजी करंडक स्पर्धेच्या नव्या हंगामात आपले मनसुबे स्पष्ट केले असून आगामी सामन्यांसाठी आपला आत्मविश्वास उंचावला आहे.