नवी दिल्ली : जपानमधील आयची-नागोया येथे सुरू असलेल्या आशियाई क्रीडा स्पर्धा २०२६ मध्ये भारताचा युवा खेळाडू जय मीना याने इतिहास घडवला आहे. पुरुषांच्या एकेरी सॉफ्ट टेनिस स्पर्धेत त्याने चमकदार कामगिरी करत कांस्यपदक (Bronze Medal) आपल्या नावावर केले. आशियाई क्रीडा स्पर्धेच्या इतिहासात भारताने सॉफ्ट टेनिस या खेळात जिंकलेले हे आतापर्यंतचे पहिलेच पदक आहे. या अभूतपूर्व आणि ऐतिहासिक विजयाबद्दल पंतप्रधान नरेंद्र मोदी यांनी जय मीनाचे मनापासून अभिनंदन केले आहे.

पंतप्रधानांकडून कौतुकाचा वर्षाव

पंतप्रधान कार्यालयाने (PMO) ‘X’ (ट्विटर) वर विशेष संदेश शेअर करत लिहिले, “भारतीय सॉफ्ट टेनिसच्या इतिहासातील हा अतिशय अभिमानास्पद आणि ऐतिहासिक क्षण आहे! पुरुषांच्या एकेरी प्रकारात कांस्यपदक पटकावून देशासाठी सॉफ्ट टेनिसमधील पहिलेवहिले पदक जिंकल्याबद्दल जय मीनाचे मनापासून अभिनंदन. त्याची ही कामगिरी भारतातील या खेळासाठी एक नवा अध्याय सुरू करणारी ठरेल. या पदकामुळे प्रेरित होऊन देशातील अनेक तरुण खेळाडू या खेळाकडे आकर्षित होतील आणि आंतरराष्ट्रीय स्तरावर भारताचे नाव उज्ज्वल करतील, असा मला विश्वास आहे. जयला त्याच्या पुढील वाटचालीसाठी खूप खूप शुभेच्छा!”

https://www.prahaar.in/2026/09/23/iphone-18-pro-theft-is-this-the-new-iphone-asking-this-question-a-conman-snatched-the-phone-and-fled-the-brand-new-iphone-vanished-on-the-third-day/

उपांत्य फेरीत जोरदार लढा

उपांत्य फेरीत जय मीनाचा सामना जपानच्या तकायुकी कुरोसाका या बलाढ्य खेळाडूशी झाला. सामन्याची सुरुवात जयसाठी कठीण राहिली आणि तो पहिले तीन संच मागे पडला. परंतु, हार न मानता जयने अत्यंत धैर्याने पुनरागमन केले आणि सलग चौथे आणि पाचवे संच जिंकून सामन्यात २-३ अशी जोरदार मुसंडी मारली. मात्र, मोक्याच्या क्षणी सहाव्या संचात जपानी खेळाडूने ४-१ अशी बाजी मारल्यामुळे जयला २-४ अशा फरकाने पराभवाचा सामना करावा लागला आणि कांस्यपदकावर समाधान मानावे लागले.

उपांत्यपूर्व फेरीतच पदक झाले होते पक्के

याआधी खेळल्या गेलेल्या उपांत्यपूर्व (Quarter-Final) फेरीच्या अटीतटीच्या सामन्यात जयने फिलीपिन्सच्या शेरविन नुगुईटचा पराभव करत उपांत्य फेरीत प्रवेश निश्चित केला होता. आशियाई क्रीडा स्पर्धेत उपांत्य फेरीत पोहोचणाऱ्या सर्व चार खेळाडूंना पदकाची खात्री असते. त्यामुळे उपांत्यपूर्व फेरीत मिळवलेल्या या विजयानेच भारताचे सॉफ्ट टेनिसमधील ऐतिहासिक पदक पक्के केले होते.

भारतासाठी बुधवारचा दिवस ठरला पदकांचा

बुधवारी भारताच्या खेळाडूंनी आशियाई क्रीडा स्पर्धेत विविध खेळांमध्ये चमकदार कामगिरी केली. जय मीनाच्या ऐतिहासिक पदकासोबतच, भारताची स्टार वेटलिफ्टर मिराबाई चानू हिने महिलांच्या ४९ किलो वजनी गटात रौप्यपदक जिंकले. तर दुसरीकडे, पुरुषांच्या आणि महिलांच्या स्कीट शूटिंग (Skeet Shooting) संघांनी अचूक निशाणा साधत कांस्यपदके पटकावली.

हॉकी, कबड्डी आणि इतर खेळांमध्ये भारताचा दबदबा

महिला हॉकी : भारतीय संघाने पूल ‘बी’ मधील सामन्यात थायलंडचा २०-१ असा एकतर्फी आणि दणदणीत पराभव केला.

कबड्डी : भारतच्या पुरुष आणि महिला दोन्ही संघांनी आपापल्या सामन्यांमध्ये विजय मिळवून आगेकूच केली.

स्क्वॅश : अभय सिंग आणि तन्वी खन्ना यांनी आपापल्या एकेरी सामन्यांमध्ये विजय मिळवत पुढची फेरी गाठली.

रोइंग व कॅनो स्प्रिंट : भारतीय खेळाडूंनी शानदार कामगिरी करत अंतिम आणि उपांत्य फेरीत आपले स्थान निश्चित केले.

टेबल टेनिस व बॉक्सिंग : टेबल टेनिसच्या मिश्र दुहेरीत भारतीय जोड्यांनी पुढील फेरीत प्रवेश केला, तर बॉक्सिंगमध्ये पुरुषांच्या ८० किलो वजनी गटात अंकुशने बहरीनच्या हम्सा वोगेलचा पराभव करत विजय मिळवला.

पदकतालिकेतील भारताची स्थिती

या सर्व उत्कृष्ट कामगिरीच्या जोरावर भारताची एकूण पदकसंख्या आता ११ वर पोहोचली आहे. यासह भारत पदकतालिकेत १२ व्या स्थानावर आहे, तर ७५ पदकांसह चीन पदकतालिकेत पहिल्या स्थानावर अव्वल आहे.