पुणे: गणेशोत्सवाच्या काळामध्ये, पुणेकरांना महामेट्रोकडून दिलासा मिळाला आहे. मुंबई- पुण्यामध्ये गणेशोत्सवासाठी मोठ्या प्रमाणावर भाविकांची गर्दी असते. या काळामध्ये महा मेट्रोकडून अतिरिक्त वेळेमध्ये मेट्रो चालवली जाणार आहे. त्यामुळे जर तुमचा पुण्यामध्ये गणेशोत्सव साजरा करण्याचा विचार असेल, तर तुम्ही नक्की जाऊ शकता. ‘पुणे मेट्रो’ने त्यांच्या सोशल मिडिया हँडलवरून गणेशभक्तांना ही महत्त्वाची बातमी दिली आहे. गणेशोत्सवाच्या काळामध्ये गणेशभक्तांची वाढती गर्दी लक्षात घेता, पुणे मेट्रोने विशेष वेळापत्रक जाहीर केले आहे.

https://www.prahaar.in/2026/09/10/mpsc-poor-preparation-debt-stress-and-despair-punyaat-28-year-old-tarunachi-commits-suicide/

१४ सप्टेंबर ते १६ सप्टेंबर या तीन दिवसांसाठी सकाळी ६ ते रात्री ११ वाजेपर्यंत या नियमित वेळेमध्ये मेट्रो चालवली जाणार आहे. तर, १७ सप्टेंबर ते २४ सप्टेंबरपर्यंत सकाळी ६ ते मध्यरात्री २ वाजेपर्यंत मेट्रो चालवली जाणार आहे. तर, शुक्रवारी २५ सप्टेंबर २०२६ रोजी म्हणजेच, अनंत चतुर्दशीच्या दिवशी सकाळी ६ ते शनिवारी २६ सप्टेंबर २०२६ रोजी रात्री ११ वाजेपर्यंत पुणे मेट्रोची सेवा सुरू राहील. एकूण ४१ तासांसाठी महा मेट्रोकडून गणेशभक्तांना ही खास सेवा दिली जाणार आहे. त्यानंतर २७ सप्टेंबरपासून मेट्रोची सेवा पुन्हा नियमित वेळेनुसार सुरू होईल.

बाप्पाच्या दर्शनासाठी, पुणे मेट्रोची साथ!
यंदाच्या गणेशोत्सवात भक्तांच्या सोयीसाठी पुणे मेट्रोच्या सेवेत वाढ करण्यात येणार आहे. या वेळेपत्रकानुसार आपल्या बाप्पा दर्शनाचे नियोजन करा. बाप्पाच्या दर्शनासाठी येताना पुणे मेट्रोचा जास्तीत जास्त वापर करा आणि पर्यावरणपूरक प्रवासातून… pic.twitter.com/iJ1F366u13

— Pune Metro Rail (@metrorailpune) September 9, 2026

शिवाय, गणेशोत्सवाच्या काळात मेट्रो स्थानकांवर आणि मेट्रोमध्ये प्रवाशांची मोठी गर्दी होण्याची शक्यता आहे. त्यामुळे मोबाईल, पाकिट, दागिने आणि इतर मौल्यवान वस्तू सांभाळून ठेवण्याची माहिती, मेट्रो प्रशासनाने आणि पोलिस प्रशासनाने नागरिकांना दिली आहे. गर्दीचा फायदा घेऊन पाकीटमारांकडून चोरी होण्याची शक्यता असल्याने प्रवाशांनी विशेष खबरदारी घ्यावी. मेट्रो प्रशासनानेही गर्दीचे नियोजन आणि सुरक्षेच्या उपाययोजनांवर भर दिला आहे. दरम्यान, गणेशोत्सवाच्या काळामध्ये गणेशभक्तांकडून मेट्रोला मिळणारा प्रतिसाद लक्षात घेता, महामेट्रोने गणेशोत्सवापासून गर्दीच्या वेळेत मेट्रोची वारंवारता वाढविण्याचे नियोजन केले आहे. पीक अवर्समध्ये दर पाच मिनिटांनी मेट्रो उपलब्ध करून देण्यात येणार आहे. या योजनेची महामेट्रोकडून तपासणी केली जात आहे, चाचणी यशस्वी होताच ती आंमलात आणली जाणार आहे.