ग्लासगो : जिद्द, चिकाटी आणि कठोर परिश्रमांच्या जोरावर कोणतीही स्वप्ने पूर्ण करता येतात, हे त्रिपुराच्या २३ वर्षीय अस्मिता डे हिने पुन्हा एकदा सिद्ध करून दाखवले आहे. ग्लासगो येथे सुरू असलेल्या ‘राष्ट्रकुल क्रीडा स्पर्धा २०२६’ (CWG 2026) मध्ये अस्मिताने ज्युडो खेळात ऐतिहासिक सुवर्णपदक जिंकले आहे. राष्ट्रकुल खेळांच्या इतिहासात ज्युडोमध्ये सुवर्णपदक पटकावणारी ती पहिलीच भारतीय खेळाडू ठरली आहे. एका अत्यंत सामान्य कुटुंबातून आलेल्या अस्मिताचा हा सुवर्णप्रवास संपूर्ण देशासाठी प्रेरणादायी ठरत आहे.

ॲथलेटिक्सच्या ट्रॅकपासून ज्युडोच्या मॅटपर्यंतचा रंजक प्रवास

२२ मार्च २००३ रोजी त्रिपुरातील बेलोनिया येथे जन्माला आलेल्या अस्मिताची कौटुंबिक पार्श्वभूमी अत्यंत हलाखीची होती. तिचे वडील अर्जुन कुमार डे हे सायकल दुरुस्तीचे (मेकॅनिक) काम करून कुटुंबाचा उदरनिर्वाह चालवायचे. सुरुवातीला अस्मिताला धावण्याची आवड होती आणि ती ८०० मीटर शर्यतीत भाग घ्यायची. मात्र, एका स्थानिक प्रशिक्षकाने तिच्यातील क्षमता ओळखून तिला ज्युडोमध्ये नशीब आजमावण्याचा सल्ला दिला आणि हाच निर्णय तिच्या आयुष्याला कलाटणी देणारा ठरला. अस्मिताने बेलोनिया विद्यापीठ कोचिंग सेंटरमध्ये प्रशिक्षक बीना देबनाथ यांच्याकडून ज्युडोचे प्राथमिक धडे गिरवले. त्यानंतर त्रिपुरा स्पोर्ट्स स्कूलमध्ये माणिक लाल देब यांनी तिच्या कौशल्याला पैलू पाडले. शालेय स्पर्धा आणि ‘खेलो इंडिया’मधील तिच्या चमकदार कामगिरीमुळे २०१८ मध्ये तिची निवड भोपाळ येथील ‘साई’ (SAI) सेंटरमध्ये झाली, जिथे ज्येष्ठ प्रशिक्षक यशपाल सोलांकी यांनी तिला आंतरराष्ट्रीय स्तरासाठी तयार केले.

https://prahaar.in/2026/08/01/commonwealth-games-2026-day-10-live-updates-india-medal-tally-boxing-finals-athletics-judo-results-lovlina-borgohain/

आंतरराष्ट्रीय स्तरावर वर्चस्व आणि पदकांची कमाई

भारतीय ज्युडोपटू अवतार सिंग आणि जपानची स्टार खेळाडू उता आबे यांना आदर्श मानणाऱ्या अस्मिताने खूप कमी कालावधीत आंतरराष्ट्रीय स्तरावर आपली ओळख निर्माण केली. २०२२ मध्ये थायलंडमध्ये झालेल्या आशियाई ज्युनिअर स्पर्धेत पदक जिंकून ती त्रिपुराची पहिली ज्युडोपटू ठरली.

त्यानंतर तिची विजयाची घोडदौड सुरूच राहिली :

२०२३ (मकाऊ ज्युनिअर आशिया कप): ४८ किलो वजनी गटात सुवर्णपदक.

२०२५ (कॅसाब्लांका आफ्रिकन ओपन, मोरोक्को): तिचे पहिले वरिष्ठ (Senior) आंतरराष्ट्रीय सुवर्णपदक.

ग्लासगो राष्ट्रकुल स्पर्धेत थरारक फायनल

ग्लासगो येथील राष्ट्रकुल स्पर्धेत महिलांच्या ४८ किलो वजनी गटात अस्मिताने अप्रतिम कौशल्याचे प्रदर्शन केले. उपांत्यपूर्व फेरीत तिने स्कॉटलंडच्या ईव्हा ईविंगचा पराभव केला, तर उपांत्य फेरीत स्थानिक खेळाडू समर शॉ हिला धूळ चारत फायनलमध्ये धडक मारली. अंतिम सामन्यात तिचा सामना कॅनडाच्या प्रबळ प्रतिस्पर्धी हायडी क्वाच हिच्याशी झाला. हा सामना अत्यंत चुरशीचा झाला आणि एका टप्प्यावर अस्मिता गुणांनी मागे पडली होती. परंतु, तिने संयम न गमावता रणनीती बदलली. सामना ‘गोल्डन स्कोअर’च्या टप्प्यात गेला, जिथे अस्मिताने निर्णायक डावाचा वापर करत प्रतिस्पर्ध्याला चितपट केले आणि भारताच्या खात्यात ऐतिहासिक सुवर्णपदक जमा केले. सायकल दुरुस्तीच्या छोट्याशा दुकानापासून सुरू झालेला अस्मिताचा हा प्रवास आज जागतिक मंचावर भारताचा तिरंगा उंचावण्यापर्यंत पोहोचला आहे. वय अवघे २३ वर्षे असलेल्या अस्मिताचे पुढील मुख्य ध्येय आता ‘ऑलिम्पिक पदक’ जिंकणे हेच आहे.