CWG2026 : ग्लास्गो येथे रंगणाऱ्या राष्ट्रकुल क्रीडा स्पर्धा २०२६ (CWG 2026) च्या औपचारिक उद्घाटनापूर्वीच भारताने आपल्या पदक तालिकेचे खाते दणक्यात उघडले आहे. ऑलिम्पिक पदक विजेती स्टार मुष्टियुद्धपटू लव्हलिना बोरगोहेन (Lovlina Borgohain) हिने महिलांच्या ७५ किलो वजनी गटात भारतासाठी किमान ‘कांस्यपदक’ निश्चित केले आहे. विशेष म्हणजे, रिंगमध्ये एकही पंच न मारताच तिला हे यश मिळाल्यामुळे क्रीडा वर्तुळात मोठी चर्चा रंगली आहे.

https://prahaar.in/2026/07/23/ind-vs-zim-1st-t20i-shreyas-iyer-makes-a-strong-entry-breaking-dhonis-record-wins-the-toss-for-the-eighth-consecutive-time/

रिंगमध्ये उतरण्यापूर्वीच ऐतिहासिक ‘बाय’

आसामच्या लव्हलिनाला महिलांच्या ७५ किलो वजनी गटात ‘बाय’ (Bye) मिळाल्यामुळे तिने थेट उपांत्य फेरीत (Semifinals) धडक मारली आहे. राष्ट्रकुल स्पर्धेच्या बॉक्सिंग नियमांनुसार, उपांत्य फेरीत पोहचणाऱ्या दोन्ही खेळाडूंना थेट पदके दिली जातात. त्यामुळे रिंगमध्ये प्रत्यक्ष उतरण्याआधीच लव्हलिनाचे पोडियम फिनिश आणि किमान कांस्यपदक निश्चित झाले आहे. आता ३१ जुलै रोजी सुवर्णपदकाकडे पाऊल टाकण्यासाठी ती रिंगमध्ये उतरेल. या उपांत्य फेरीच्या लढतीत तिचा सामना तुवालूच्या टी.के.बी.पी. ताफाकी हिच्याशी होणार आहे. लव्हलिनाच्या या कामगिरीमुळे तिच्या कारकिर्दीतील राष्ट्रकुल पदकाची प्रतीक्षा संपली असून १२४ सदस्यीय भारतीय पथकाचा आत्मविश्वास द्विगुणीत झाला आहे.

https://prahaar.in/2026/07/23/ashadhi-wari-charan-seva-safeguarding-the-health-of-lakhs-of-warkaris-4-96-lakh-warkaris-across-14-districts-directly-benefited/

भव्य उद्घाटन आणि प्रमुख खेळाडूंवर नजर

स्पर्धेचा बिगुल वाजण्याआधी मिळालेल्या या सरप्राईज पदकाने भारतीय मोहिमेची सुरुवात अत्यंत सकारात्मक पद्धतीने झाली आहे. गुरुवारी ‘लॉन बॉल्स’ सामन्यांनी भारतीय मोहिमेची अधिकृत सुरुवात झाली असून, त्यानंतर सायंकाळी भव्य उद्घाटन सोहळा पार पडला. यंदाच्या आवृत्तीत काही पारंपरिक क्रीडा प्रकारांना वगळण्यात आल्यामुळे स्पर्धा काहीशी संक्षिप्त झाली असली, तरी भारतीय खेळाडू आपला दबदबा कायम ठेवण्यासाठी सज्ज आहेत. ॲथलेटिक्सच्या स्पर्धा २७ जुलै ते १ ऑगस्ट दरम्यान खेळवल्या जाणार असून, ऑलिम्पिक चॅम्पियन आणि विद्यमान विश्वविजेता नीरज चोप्रा याकडे सर्वांचे विशेष लक्ष असेल. दुखापतीमुळे मागील बर्मिंगहॅम २०२२ स्पर्धेला मुकलेला नीरज, २०१८ मधील आपले सुवर्णपदक पुन्हा मिळवण्यासाठी सज्ज आहे. तसेच, वेटलिफ्टिंगमध्ये ऑलिम्पिक रौप्यपदक विजेती आणि दोन वेळची राष्ट्रकुल सुवर्णविजेती मीराबाई चानू भारतीय आव्हानाचे नेतृत्व करत असून तिच्याकडूनही सुवर्णपदकाची प्रबळ अपेक्षा आहे.

https://prahaar.in/2026/07/23/badlapur-and-wangani-areas-hit-by-gusty-winds-and-heavy-rain-normal-life-disrupted-power-supply-interrupted/

भारतीय खेळाडूंचा सहभाग

यंदाच्या राष्ट्रकुल क्रीडा स्पर्धेत भारताचे खेळाडू एकूण आठ मुख्य आणि पाच ‘पॅरा’ क्रीडा प्रकारांत आपले कौशल्य पणाला लावत आहेत:

मुख्य खेळ: ॲथलेटिक्स, बॉक्सिंग, वेटलिफ्टिंग, ज्युडो, आर्टिस्टिक जिम्नॅस्टिक्स, ट्रॅक सायकलिंग, बॉल्स आणि जलतरण.

पॅरा क्रीडा प्रकार: पॅरा-ॲथलेटिक्स, पॅरा-पॉवरलिफ्टिंग, पॅरा-जलतरण, पॅरा-ट्रॅक सायकलिंग आणि ३x३ व्हीलचेअर बास्केटबॉल.

लव्हलिनाच्या या पहिल्या पदकानंतर इतर भारतीय खेळाडूंकडूनही दमदार कामगिरीची अपेक्षा केली जात आहे.