Nashik : नाशिक शहरात खळबळजनक घटना घडली आहे. पंचवटी (Panchavati) परिसरात पोलिस असल्याचे भासवून तिघा अज्ञात आरोपींनी, ज्यामध्ये एका महिलेचाही समावेश आहे, २९ वर्षीय खासगी कंपनीतील कर्मचाऱ्याचे बंदुकीचा धाक दाखवून अपहरण केले. त्यानंतर त्याच्याकडील ७० लाखांची रोकड आणि मोबाईल फोन लुटून आरोपी फरार झाले. ही धक्कादायक घटना ८ जुलै रोजी दुपारी घडली असून पोलिसांकडून तपास सुरु आहे. (Nashik Crime News)

https://prahaar.in/2026/07/11/vietnam-boat-capsize-phu-quoc-island-indian-tourists-rescue-operation-33-tourists-hanoi-embassy/

नेमकं काय घडलं ?

तक्रारदार हा पंचवटी (Panchavati) परिसरातील रहिवासी असून तो दिंडोरी (Dindori) येथील एका खासगी कंपनीत काम करतो. कंपनीकडून मालमत्ता खरेदी करण्याचे नियोजन असल्याने कंपनीच्या कार्यालयातील लॉकरमधून ७० लाखांची रोकड तो आपल्या घरी घेऊन जात होता. सायंकाळी साडेचारच्या सुमारास तो स्कूटरजवळ असताना खाकी पॅन्ट परिधान केलेले दोन व्यक्ती त्याच्याजवळ आले आणि स्वतःला पोलिस असल्याचे सांगितले. त्यांनी ओळखपत्र मागितल्यावर त्यापैकी एकाने कथितपणे बंदूक दाखवत त्याच्या बॅगेची झडती घेतली. (Nashik Crime News)

यानंतर आरोपींनी त्याला लाल दिवा आणि सायरन लावलेल्या मल्टी युटिलिटी वाहनात (एमयूव्ही) जबरदस्तीने बसवले. सायरन वाजवत हे वाहन पंचवटी (Panchavati) परिसरातून फिरवण्यात आले. वाहनात असलेल्या एका महिलेने तक्रारदाराचा मोबाईल हिसकावून घेतल्याचे त्याने पोलिसांना सांगितले. त्यानंतर आरोपींनी त्याला द्वारका उड्डाणपुलाजवळ खाली उतरवून ७० लाखांची रोकड आणि मोबाईल घेऊन घटनास्थळावरून पलायन केले. (Nashik Crime News)

https://prahaar.in/2026/07/11/nashik-to-host-state-level-competition-after-14-years/

पंचवटी पोलिसांकडून तपास सुरु

घटनेनंतर तक्रारदाराने त्याच रात्री पंचवटी पोलिस ठाण्यात (Panchavati Police Station) धाव घेत तक्रार दाखल केली. या प्रकरणी पंचवटी पोलिसांनी (Panchavati Police) भारतीय न्याय संहिता (बीएनएस) अंतर्गत खंडणीसाठी अपहरण, दरोडा, फसवणूक आणि गुन्हेगारी धमकी यासह संबंधित कलमान्वये गुन्हा दाखल केला आहे. आरोपींची ओळख पटविण्यासाठी तसेच गुन्ह्यात वापरण्यात आलेल्या वाहनाचा शोध घेण्यासाठी पोलिस सीसीटीव्ही फुटेजची तपासणी करत आहेत.

दरम्यान, जर नागरिकांना पुढील व्यक्ती पोलीस असल्याचा संशय असेल तर नागरिक त्याचे आयडी मागू शकतात. सोबतच शंका वाटल्यास पोलीस स्टेशनमध्ये खात्री करू शकता. त्यामुळे अशा घटनांमध्ये सावध राहणे गरजेचे आहे.