पश्चिम बंगालमध्ये निवडणूक प्रक्रियेत यंदा अभूतपूर्व मतदानाचा कल दिसून आला आहे. पहिल्या टप्प्यात ९३.१९ टक्के मतदान झाले होते, तर दुसऱ्या टप्प्यातही जवळपास ९२ टक्के मतदान नोंदवले गेले. यामुळे दोन्ही टप्प्यांचा एकूण सरासरी मतदानाचा दर ९२.६३ टक्क्यांपेक्षा अधिक झाला असून, हा देशातील कोणत्याही राज्यासाठी आतापर्यंतचा नवा विक्रम मानला जात आहे.

राज्यात आज, बुधवारी दुसऱ्या टप्प्याचे मतदान पूर्ण झाले. यानंतर दोन्ही टप्प्यांचा मिळून एकूण मतदानाचा दर ९२.५२ टक्क्यांपर्यंत पोहोचला आहे. यापूर्वी पश्चिम बंगालमध्ये कधीही मतदान ८४.७२ टक्क्यांपेक्षा जास्त झाले नव्हते. त्यामुळे यंदाची निवडणूक राज्याच्या निवडणूक इतिहासात एक महत्त्वाचा टप्पा ठरली आहे.देशपातळीवर पाहता, हा मतदानाचा दर आतापर्यंतचा सर्वोच्च मानला जात आहे. यापूर्वी हा विक्रम त्रिपुराकडे होता, जिथे २०१३ मध्ये ९१.८२ टक्के मतदान नोंदवले गेले होते. मात्र पश्चिम बंगालने हा विक्रम यंदा मोडीत काढला आहे.

https://prahaar.in/2026/04/29/bjp-set-to-come-to-power-in-west-bengal-exit-polls-predict/

मागील निवडणुकांपेक्षा मोठी वाढ :

राज्यात २०२१ च्या निवडणुकीत ८ टप्प्यांत मतदान झाले होते आणि एकूण मतदानाचा दर ८२.१७ टक्के होता. त्या तुलनेत यंदा केवळ दोन टप्प्यांतच मतदान पूर्ण झाले असून मतदानात मोठी वाढ नोंदवली गेली आहे. तर २०२१ मध्ये संबंधित मतदारसंघांमध्ये मतदान अनुक्रमे ८३.१८ टक्के आणि ८१.०८ टक्के होते. त्याच्या तुलनेत २०२६ मध्ये याच भागात मतदान ९० टक्क्यांच्या पुढे गेले आहे.

मतदानाचा ऐतिहासिक प्रवास :

पश्चिम बंगालमध्ये याआधी सर्वाधिक मतदान २०११ मध्ये ८४.३३ टक्के झाले होते. त्याच निवडणुकीनंतर राज्यात राजकीय सत्ता बदल झाला होता. याशिवाय १९९६ आणि २००६ मध्येही मतदान ८ टक्क्यांपेक्षा जास्त झाले होते. मात्र २०२६ मध्ये हा सर्व रेकॉर्ड मोडला गेला आहे.

https://prahaar.in/2026/04/29/split-in-mva-over-maharashtra-legislative-council-candidature/

मतदारसंख्या आणि सहभागात वाढ :

राज्यात २०२१ मध्ये ७.३४ कोटी मतदार नोंदणीकृत होते, त्यापैकी ६.०३ कोटी मतदारांनी मतदान केले होते. २०२६ मध्ये विशेष मतदार यादी पुनरावलोकन (एसआयआर) नंतर ६.८२ कोटी मतदार नोंदणीकृत झाले असून त्यापैकी ६.२५ कोटींहून अधिकांनी मतदान केले आहे. त्यामुळे मतदार सहभागातही वाढ दिसून आली आहे.