बेंगळुरू शहरातील नंदिनी लेआउट परिसरातून एक धक्कादायक घटना समोर आली आहे. रविवारी उशिरा रात्री लागलेल्या भीषण आगीत ५० तरुणींचा जीव थोडक्यात वाचला. या घटनेचा थरारक व्हिडिओ सध्या सोशल मीडियावर मोठ्या प्रमाणात व्हायरल होत आहे.

मिळालेल्या माहितीनुसार, एका LED बॅनरच्या गोदामाला अचानक आग लागली. ही आग काही क्षणांतच भीषण स्वरूप धारण करत शेजारील चार मजली लेडीज PG इमारतीपर्यंत पोहोचली. आगीच्या प्रचंड ज्वाळा आणि धुरामुळे परिसरात भीतीचे वातावरण निर्माण झाले.

https://prahaar.in/2026/04/28/iran-america-war-abbas-araghchis-third-visit-to-pakistan-in-48-hours-peace-efforts-gain-momentum/

PG इमारतीत राहणाऱ्या सुमारे ५० तरुणी त्या वेळी आतच अडकल्या होत्या. अचानक आग वाढू लागल्याने घबराट पसरली. जीव वाचवण्यासाठी काही मुलींनी आरडाओरडा करत थेट कंपाउंडवरून उड्या मारल्या, तर काहींनी इतर मार्गाने बाहेर पडण्याचा प्रयत्न केला. या सर्व घटनांचे CCTV फुटेज समोर आले असून त्यात मुलींची धावपळ आणि भीती स्पष्ट दिसून येते.

घटनेची माहिती मिळताच अग्निशमन दल आणि पोलिसांनी तात्काळ घटनास्थळी धाव घेतली. बचावकार्य वेगाने राबवून सर्व तरुणींना सुरक्षित बाहेर काढण्यात आले. सुदैवाने या भीषण आगीत कोणतीही जीवितहानी झाली नाही, मात्र काही जण किरकोळ जखमी झाल्याची माहिती आहे.

https://prahaar.in/2026/04/28/israel-lebanon-war-resumes-hezbollah-drone-attack-on-israeli-soldiers/

प्राथमिक तपासात शॉर्ट सर्किटमुळे गोदामात आग लागल्याचा अंदाज व्यक्त केला जात आहे. मात्र, नेमकं कारण शोधण्यासाठी अधिकृत चौकशी सुरू आहे. या घटनेनंतर परिसरातील सुरक्षेच्या उपाययोजनांवर प्रश्नचिन्ह उपस्थित झाले असून, स्थानिक प्रशासनाने अग्निसुरक्षा नियमांची काटेकोर अंमलबजावणी करण्याचे निर्देश दिले आहेत.

या घटनेने पुन्हा एकदा शहरातील PG आणि व्यावसायिक इमारतींमधील सुरक्षा व्यवस्थेचा मुद्दा ऐरणीवर आणला आहे.