Home क्राईम ऑनलाइन बेटिंगच्या कर्जापायी वृद्धेची निर्घृण हत्या! गोव्यात मौजमजा करणाऱ्या आरोपीला पोलिसांनी कसे पकडले?

ऑनलाइन बेटिंगच्या कर्जापायी वृद्धेची निर्घृण हत्या! गोव्यात मौजमजा करणाऱ्या आरोपीला पोलिसांनी कसे पकडले?

0
ऑनलाइन बेटिंगच्या कर्जापायी वृद्धेची निर्घृण हत्या! गोव्यात मौजमजा करणाऱ्या आरोपीला पोलिसांनी कसे पकडले?

रायगड : ऑनलाइन बेटिंग आणि ट्रेडिंगच्या व्यसनामुळे मोठ्या कर्जाच्या ओझ्याखाली दबलेल्या 21 वर्षीय तरुणाने पैशांच्या हव्यासापोटी 71 वर्षीय ज्येष्ठ महिलेची निर्घृण हत्या केल्याचा हादरवून टाकणारा प्रकार खोपोली येथे उघडकीस आला आहे. हत्या केल्यानंतर महिलेचे सोन्याचे दागिने चोरून मित्रांसोबत गोव्याला गेलेल्या मुख्य आरोपीचा खोपोली पोलिसांनी तांत्रिक तपासाच्या आधारे शोध घेत त्याला बेड्या ठोकल्या आहेत. तसेच, चोरीचे सोन्याचे दागिने विकण्यास मदत करणाऱ्या आणखी एका आरोपीला पोलिसांनी अटक केली असून, या घटनेमुळे परिसरात मोठी खळबळ उडाली आहे.

पोलिसांनी दिलेल्या माहितीनुसार, खोपोलीतील भानवज येथील इंद्रप्रस्थ इमारतीत 11 नोव्हेंबर रोजी महेश्वरी रामचंद्र पन्नीकर (वय 71) यांची हत्या झाली होती. आरोपीने अत्यंत क्रूरपणे त्यांचे हातपाय कपड्याने बांधले आणि त्यानंतर त्यांचा गळा आवळला. एवढ्यावरच न थांबता आरोपीने त्यांच्या डोक्यावर लादीने वार करून त्यांची हत्या केली. या भयंकर कृत्यानंतर आरोपीने ज्येष्ठ महिलेच्या गळ्यातील सोन्याचे मंगळसूत्र आणि हातातील 3 सोन्याच्या बांगड्या चोरून तिथून पळ काढला.

या गंभीर गुन्ह्याचा छडा लावण्यासाठी पोलिसांनी परिसरातील सीसीटीव्ही फुटेज, मोबाईल कॉल डिटेल रेकॉर्ड (CDR) आणि गोपनीय माहितीची मदत घेतली. या तांत्रिक पुराव्यांच्या आधारे पोलिसांनी संशयित आरोपी यश मिनबहादूर थापा (वय 21) याचा माग काढला. प्राथमिक तपासात तो ऑनलाइन बेटिंग ॲपच्या माध्यमातून ट्रेडिंग करत असल्याचे आणि या व्यवहारांसाठी त्याने अनेकांकडून मोठ्या प्रमाणात पैसे घेतल्याचे समोर आले आहे. या आर्थिक व्यवहारांमुळे तो प्रचंड कर्जाच्या विळख्यात अडकला होता.

https://www.prahaar.in/2026/11/19/body-of-a-20-year-old-man-found-at-konkankada-on-harishchandragad-mystery-deepens-following-claims-of-blackmail/

पैशांची तीव्र निकड आणि गुन्हा केल्यानंतर आपली ओळख पटण्याची भीती यामुळेच त्याने ज्येष्ठ महिलेची हत्या करून दागिने लांबवल्याचे तपासात निष्पन्न झाले आहे. गुन्हा घडल्यानंतर आरोपी मित्रांसोबत गोव्याला निघून गेला होता. मात्र, खोपोली पोलिसांनी तांत्रिक तपासाच्या जोरावर त्याचा ठावठिकाणा शोधून काढला आणि गोव्यातून त्याला अटक केली. पोलीस चौकशीदरम्यान त्याने या गुन्ह्याची कबुली दिल्याचे अधिकाऱ्यांनी सांगितले.

रायगडच्या पोलीस अधीक्षक आंचल दलाल यांच्या मार्गदर्शनाखाली पोलीस निरीक्षक सचिन हिरे आणि खोपोली पोलीस पथकाने ही प्रभावी कारवाई केली. चोरीचे दागिने विक्रीसाठी मदत करणाऱ्या दुसऱ्या आरोपीलाही अटक करण्यात आल्याने या गुन्ह्याच्या पुढील तपासाला महत्त्वाची दिशा मिळाली आहे. ऑनलाइन बेटिंग आणि ट्रेडिंगच्या वाढत्या व्यसनातून निर्माण होणाऱ्या आर्थिक संकटाचा शेवट एका ज्येष्ठ नागरिकाच्या हत्येत झाल्याने, या व्यसनाच्या गंभीर सामाजिक व गुन्हेगारी परिणामांवर पुन्हा एकदा चिंता व्यक्त केली जात आहे.

LEAVE A REPLY

Please enter your comment!
Please enter your name here