Home ब्रेकिंग न्यूज डोनाल्ड ट्रम्प यांच्या हत्येचा कट रचणाऱ्या पाकिस्तानी एजंटला अमेरिकेत तब्बल 27 वर्षांची कठोर शिक्षा

डोनाल्ड ट्रम्प यांच्या हत्येचा कट रचणाऱ्या पाकिस्तानी एजंटला अमेरिकेत तब्बल 27 वर्षांची कठोर शिक्षा

0
डोनाल्ड ट्रम्प यांच्या हत्येचा कट रचणाऱ्या पाकिस्तानी एजंटला अमेरिकेत तब्बल 27 वर्षांची कठोर शिक्षा
डोनाल्ड ट्रम्प यांच्या हत्येचा कट रचणाऱ्या पाकिस्तानी एजंटला अमेरिकेत तब्बल 27 वर्षांची कठोर शिक्षा (Photo: Facebook)

अमेरिकेचे राष्ट्राध्यक्ष डोनाल्ड ट्रम्प यांच्यासह अमेरिकेतील बड्या सरकारी अधिकाऱ्यांच्या हत्येचा भयंकर कट रचणाऱ्या एका पाकिस्तानी नागरिकाला अमेरिकी न्यायालयाने दणका दिला आहे. वॉशिंग्टन येथील संघीय न्यायालयाने या पाकिस्तानी आरोपीला तब्बल 330 महिन्यांच्या (म्हणजेच 27 वर्षे आणि 6 महिने) कठोर तुरुंगवासाची शिक्षा सुनावली आहे. इराणच्या ‘इस्लामिक रिव्होल्युशनरी गार्ड कॉर्प्स’ (IRGC) या दहशतवादी संघटनेच्या इशाऱ्यावरून हा संपूर्ण कट रचण्यात आल्याचे अमेरिकी न्याय विभागाच्या तपासात उघड झाले आहे.

अमेरिकी न्याय विभागाने जारी केलेल्या प्रसिद्धीपत्रकानुसार, शिक्षा सुनावण्यात आलेल्या 48 वर्षीय पाकिस्तानी नागरिकाचे नाव आसिफ मर्चंट असे आहे. ब्रुकलिन येथील संघीय न्यायालयात अमेरिकी जिल्हा न्यायाधीश एरिक आर. कोमिटी यांनी मर्चंटला ही शिक्षा सुनावली. यापूर्वी मार्च 2026 मध्ये संघीय न्यायमंडळाने त्याला आंतरराष्ट्रीय सीमांपलीकडे दहशतवादी कृत्य करण्याचा प्रयत्न आणि सुपारी देऊन हत्या घडवून आणण्याचा कट रचल्याप्रकरणी दोषी ठरवले होते. मर्चंट हा इराणच्या जागतिक दहशतवादी संघटना म्हणून ओळखल्या जाणाऱ्या आयआरजीसीचा प्रशिक्षित एजंट असल्याचे स्पष्ट झाले आहे.

तपासात अशी धक्कादायक माहिती समोर आली आहे की, मर्चंटने स्वेच्छेने इराणच्या आयआरजीसीमध्ये प्रवेश केला होता आणि त्याला गुप्तचर कारवायांचे विशेष प्रशिक्षण देण्यात आले होते. त्यानंतर इराणच्या वतीने अमेरिकी नेत्यांची हत्या करण्यासाठी स्थानिक मारेकरी शोधणे आणि त्यांना पैसे देणे, या मुख्य उद्देशाने तो अमेरिकेत दाखल झाला होता.

https://www.prahaar.in/2026/11/18/catastrophe-on-the-brink-us-iran-war-escalates-middle-east-once-again-on-the-verge-of-bloodshed/

धक्कादायक म्हणजे, मर्चंटने डोनाल्ड ट्रम्प यांच्याव्यतिरिक्त तत्कालीन राष्ट्राध्यक्ष जो बायडेन आणि संयुक्त राष्ट्रांतील अमेरिकेच्या माजी राजदूत निक्की हेली यांचीही संभाव्य लक्ष्य म्हणून नावे घेतली होती. त्या काळात हे सर्वच दिग्गज नेते अमेरिकी राष्ट्राध्यक्षपदाच्या निवडणुकीचे प्रमुख उमेदवार होते.

जानेवारी 2020 मध्ये अमेरिकेने केलेल्या ड्रोन हल्ल्यात इराणचे माजी आयआरजीसी कमांडर कासिम सुलेमानी यांचा मृत्यू झाला होता. याचाच बदला घेण्यासाठी इराणने अमेरिकेच्या भूमीवर हा रक्तरंजित कट रचल्याचे मानले जात आहे.

या निकालावर प्रतिक्रिया देताना अमेरिकेचे अटर्नी जनरल टॉड ब्लांश यांनी सांगितले की, राष्ट्राध्यक्ष ट्रम्प यांच्या हत्येचा कट अंमलात आणण्यासाठी अमेरिकेत आलेल्या इराणी एजंटला त्याच्या गुन्ह्याची योग्य शिक्षा मिळाली आहे. अमेरिकी नेत्यांविरोधात रचलेले परकीय दहशतवादी कट न्याय विभाग कधीही सहन करणार नाही आणि या कटांमागील प्रत्येक सूत्रधाराला न्यायालयासमोर उभे करेपर्यंत ही कारवाई सुरूच राहील, असा कडक इशाराही त्यांनी दिला आहे.

LEAVE A REPLY

Please enter your comment!
Please enter your name here