Home क्रीडा Nashik : अभिमानास्पद ! जागतिक युवा टेबल टेनिस स्पर्धेसाठी नाशिकच्या कुशल चोपडाची भारतीय संघात निवड

Nashik : अभिमानास्पद ! जागतिक युवा टेबल टेनिस स्पर्धेसाठी नाशिकच्या कुशल चोपडाची भारतीय संघात निवड

0
Nashik : अभिमानास्पद ! जागतिक युवा टेबल टेनिस स्पर्धेसाठी नाशिकच्या कुशल चोपडाची भारतीय संघात निवड

नाशिक : नाशिकच्या क्रीडा क्षेत्रासाठी अभिमानास्पद बातमी आहे. टेबल टेनिसपटू कुशल चोपडा याची प्रतिष्ठेच्या जागतिक युवा अजिंक्यपद टेबल टेनिस स्पर्धेसाठी भारतीय संघात निवड झाली आहे. २१ ते २८ नोव्हेंबर २०२६ दरम्यान इस्तंबूल (तुर्की) येथे ही स्पर्धा रंगणार आहे. या निवडीमुळे आंतरराष्ट्रीय टेबल टेनिस क्षेत्रात नाशिकच्या शिरपेचात आणखी एक मानाचा तुरा खोवला गेला आहे.

या स्पर्धेसाठी निवड झालेला कुशल हा नाशिकमधून भारतीय संघात स्थान मिळवणारा पहिला मुलगा ठरला आहे. यापूर्वी तनिषा कोटेचा आणि सायली वाणी यांनी जागतिक युवा अजिंक्यपद स्पर्धेत भारताचे प्रतिनिधित्व केले आहे. त्यामुळे या प्रतिष्ठित स्पर्धेत भारताचे प्रतिनिधित्व करणारा कुशल हा नाशिक शहरातील तिसरा खेळाडू ठरला आहे. कुशलसोबत आसामचा प्रियानुज भट्टाचार्य, तमिळनाडूचे पी. बी. अभिनंदन आणि मुथु बालमुरुगन यांचीही भारतीय संघात निवड झाली आहे.

आंतरराष्ट्रीय स्तरावर पदकांची प्रभावी कामगिरी

कुशलची भारतीय संघातील निवड ही त्याच्या सातत्यपूर्ण मेहनतीचे आणि उत्कृष्ट कामगिरीचे फलित आहे. यापूर्वी त्याने ज्युनियर आशियाई अजिंक्यपद स्पर्धेत कांस्यपदक पटकावले आहे. तसेच दक्षिण आशियाई अजिंक्यपद स्पर्धेत एकेरी आणि मिश्र दुहेरी अशा दोन्ही प्रकारांत सुवर्णपदक जिंकण्याची उल्लेखनीय कामगिरी केली आहे. आतापर्यंत कुशलने विविध आंतरराष्ट्रीय स्पर्धांमध्ये आठ पदके, तर राष्ट्रीय स्तरावरील स्पर्धांमध्ये २० हून अधिक पदके मिळवली आहेत. त्याच्या या यशस्वी वाटचालीमुळे त्याने भारतीय टेबल टेनिसमध्ये स्वतःची वेगळी ओळख निर्माण केली आहे.

https://www.prahaar.in/2026/11/18/major-shakeup-in-icc-rankings-arshdeep-singh-takes-massive-leap-while-newcomer-creates-world-record/

नाशिकच्या क्रीडा वैभवात आणखी एका नावाची भर

नाशिक जिल्ह्याने आतापर्यंत विविध क्रीडा प्रकारांमध्ये राष्ट्रीय आणि आंतरराष्ट्रीय स्तरावर चमकणारे खेळाडू देशाला दिले आहेत. बुद्धिबळपटू विदित गुजराथी, धावपटू कविता राऊत, मोनिका आथरे, अंजना ठमके, कबड्डीपटू आकाश शिंदे, क्रिकेटपटू साहिल पारख, उंच उडीपटू सर्वेश कुशारे आणि धावपटू दिलीप गावित यांनी आपल्या कामगिरीच्या जोरावर नाशिकचा नावलौकिक वाढवला आहे. आता या यशस्वी परंपरेत टेबल टेनिसपटू कुशल चोपडा याचे नावही अभिमानाने जोडले जात आहे. अनेक खेळाडू क्रिकेटकडे आकर्षित होत असताना नाशिकमधील खेळाडूंनी विविध क्रीडा प्रकारांत आपली क्षमता सिद्ध केली आहे.

टेबल टेनिसमध्येही नाशिक आता आंतरराष्ट्रीय स्तरावर आपला ठसा उमटवत असल्याचे कुशलच्या यशातून स्पष्ट होत आहे. कुशलच्या या यशामागे त्याची मेहनत, जिद्द आणि खेळाप्रती असलेले समर्पण महत्त्वाचे आहे. इस्तंबूल येथे होणाऱ्या जागतिक युवा अजिंक्यपद स्पर्धेत कुशल उत्कृष्ट कामगिरी करून देशाचा आणि नाशिकचा गौरव वाढवेल, असा विश्वास क्रीडाप्रेमींकडून व्यक्त केला जात आहे. कुशलच्या या निवडीमुळे नाशिकच्या टेबल टेनिस क्षेत्राला नवी प्रेरणा मिळणार असून, आगामी काळात या खेळातून आणखी आंतरराष्ट्रीय खेळाडू घडतील, अशी अपेक्षा आहे.

LEAVE A REPLY

Please enter your comment!
Please enter your name here