‘कौन बनेगा करोडपती’ या गेम शोमध्ये नशीब आजमावलेल्या एका यूपीएससी उमेदवाराला अटक करण्यात आली आहे. मुंबईतील एका दागिन्यांच्या दुकानातून सोन्याची साखळी चोरल्याप्रकरणी वर्षभर फरार राहिल्यानंतर या तरुणाला दिल्लीत अटक करण्यात आली. दिल्ल्लीच्या उत्तम नगरचा रहिवासी असलेल्या सतीश कुमार कृष्णप्रसाद केसरीने नोकरीच्या शोधात दिल्लीत येताना मोठी स्वप्ने पाहिली होती. पण अखेरीस त्याला आपले कर्ज फेडण्यासाठी संघर्ष करावा लागला.

मूळचा बिहारचा असलेला संगणकशास्त्रातील पदवीधर असलेला हा ४२ वर्षीय तरुण आयएएस अधिकारी बनू इच्छित होता. अर्धवेळ नोकरी करत असतानाच त्याने आपल्या ध्येयासाठी मेहनत घेतली आणि केंद्रीय लोकसेवा आयोगाच्या परीक्षांची तयारी केली, पण त्याचे प्रयत्न व्यर्थ ठरले. त्यानंतर त्याने ‘कौन बनेगा करोडपती’ या लोकप्रिय गेम शोमध्ये रोख बक्षिसे जिंकण्याचा प्रयत्न केला, पण फास्टेस्ट फिंगर फर्स्ट नावाची पात्रता फेरी तो पार करू शकला नाही. हॉट सीटवर बसण्याचे त्याचे स्वप्न अपूर्णच राहिले.

ती संधी गमावल्यानंतर केसरीने आपल्या पत्नीसोबत पर्यटन आणि प्रवास व्यवसाय सुरु केला. त्याने ४-५ वाहने खरेदी करण्यासाठी कर्ज घेतले, ज्यांची नंतर ओला आणि उबारसारख्या राइड हेलिंग प्लॅटफॉर्मवर नोंदणी केली. मात्र तो व्यवसायही अयशस्वी ठरला आणि त्यात मोठे नुकसान झाले. केसरीच्या कर्जाचा डोंगर वाढतच राहिला. हताश होऊन त्याने आणखी एक धाडस केले यावेळी ते खूपच धोकादायक आणि बेकायदेशीर होते. त्याने दागिन्यांच्या दुकानात गिऱ्हाईक असल्याचे भासवून दागिने मागून ते घेऊन पळून जायचे ठरवले.

https://www.prahaar.in/2026/11/07/commotion-on-a-mumbai-local-train-an-argument-breaks-out-between-two-passengers-over-standing-near-the-doorway-one-person-falls-out-of-the-train/

गेल्या वर्षी १५ नोव्हेंबर रोजी ही योजना प्रत्यक्षात आणत त्याने मुंबईतील कांदिवली पश्चिम येथील मथुरादास रोडवरील पद्मावती ज्वेलर्समधून ४३.२ ग्रॅम वजनाची सोन्याची साखळी चोरली. त्या दागिन्याची किंमत ५ लाख रुपये होती. केसरीची योजना इथेच संपली नाही. पोलिसांना चकमा देण्यासाठी त्याने मुंबईतील ज्या वसतिगृहात तो राहत होता, तिथे एक बनावट आधारकार्ड दिले होते. वर्षभर कोणाच्याही नजरेत न येण्यासाठी त्याने आपला मोबाईल फोनही बंद ठेवला होता.

कांदिवली पोलिसांनी सीसीटीव्ही फुटेजची तपासणी केली आणि इतर तांत्रिक माहितीच्या आधारे आरोपीचा एका सक्रिय नंबर शोधून काढला. २८ ऑक्टोबर २०२६ रोजी मुंबई पोलिसांनी अखेर त्याला दिल्लीत अटक केली आणि चोरीची साखळी जप्त केली. चौकशीदरम्यान, केसरीने आपला गुन्हा कबूल केला असून मुंबईतील दिंडोशी परिसरात अशाच प्रकारची चोरी केल्याचेही त्याने मान्य केले आहे. तो सध्या पोलीस कोठडीत आहे.