परदेशात फिरायला जाताना खरेदी, हॉटेलचे बिल किंवा पर्यटनस्थळांची तिकिटे खरेदी करण्यासाठी आता भारतीय पर्यटकांना केवळ आंतरराष्ट्रीय क्रेडिट किंवा डेबिट कार्डवर अवलंबून राहण्याची गरज नाही. भारताची लोकप्रिय डिजिटल पेमेंट प्रणाली असलेली युनिफाइड पेमेंट इंटरफेस (UPI) सेवा आता परदेशातही विस्तारत आहे. दुबईतील प्रसिद्ध बुर्ज खलिफा असो किंवा सिंगापूरमधील युनिव्हर्सल स्टुडिओ, काही ठिकाणी भारतीय पर्यटकांना UPI च्या माध्यमातून थेट पेमेंट करता येत आहे.
नॅशनल पेमेंट्स कॉर्पोरेशन ऑफ इंडिया (NPCI) ची आंतरराष्ट्रीय शाखा असलेल्या NPCI इंटरनॅशनल पेमेंट्स लिमिटेडच्या माध्यमातून UPI सेवा भारताबाहेरही उपलब्ध करून देण्यात आली आहे. विविध देशांमधील स्थानिक पेमेंट नेटवर्कशी भागीदारी करून ही सुविधा विस्तारली जात आहे.
https://www.prahaar.in/2026/11/02/cyclone-murasu-cyclone-murasu-poses-a-threat-to-this-state-winds-to-blow-at-speeds-of-110-km-h-an-alert-has-been-issued-for-the-coastal-region/
या ११ देशांमध्ये UPI पेमेंटची सुविधा
भारताबाहेर UPI पेमेंट स्वीकारणाऱ्या देशांमध्ये भूतान, नेपाळ, संयुक्त अरब अमिराती (UAE), सिंगापूर, फ्रान्स, कंबोडिया, मॉरिशस, श्रीलंका, मालदीव, कतार आणि ग्रीस यांचा समावेश असल्याचे वृत्त आहे.
१. भूतान : भारताबाहेर UPI QR कोड प्रणाली स्वीकारणारा भूतान हा पहिला देश ठरला. येथे भारतीय पर्यटकांना QR कोडच्या माध्यमातून पेमेंट करता येते.
२. नेपाळ : नेपाळमध्ये भारतीय UPI ॲपच्या माध्यमातून स्थानिक व्यापाऱ्यांना पैसे देता येतात.
३. संयुक्त अरब अमिराती (UAE) : दुबईसह UAE मधील अनेक व्यापारी केंद्रांवर UPI पेमेंट स्वीकारले जाते. बुर्ज खलिफासारख्या प्रसिद्ध पर्यटनस्थळांच्या तिकिटांच्या खरेदीसाठीही ही सुविधा उपलब्ध असू शकते.
४. सिंगापूर : भारताच्या UPI प्रणालीला सिंगापूरच्या स्थानिक PayNow प्रणालीशी जोडण्यात आले आहे. त्यामुळे डिजिटल व्यवहार सुलभ झाले आहेत. युनिव्हर्सल स्टुडिओ सिंगापूरच्या तिकिटांच्या खरेदीसाठीही काही ठिकाणी UPI चा वापर करता येतो.
५. फ्रान्स : UPI स्वीकारणारा फ्रान्स हा पहिला युरोपीय देश ठरला. येथे एफिल टॉवरची तिकिटे खरेदी करणे किंवा गॅलरीज लाफायेटसारख्या ठिकाणी खरेदी करताना UPI पेमेंटचा पर्याय उपलब्ध आहे.
६. कंबोडिया : कंबोडियाच्या KHQR नेटवर्कसोबत भागीदारी करून UPI सेवा स्थानिक व्यापाऱ्यांपर्यंत पोहोचवण्यात आली आहे.
७. मॉरिशस : मॉरिशसमध्ये भारतीय पर्यटकांना सहभागी व्यापारी आस्थापनांमध्ये डिजिटल पेमेंट करता येते.
८. श्रीलंका : श्रीलंकेतील LankaQR नेटवर्कच्या माध्यमातून भारतीय पर्यटकांना UPI पेमेंटची सुविधा मिळते.
९. मालदीव : मालदीवच्या स्थानिक Fawri Instant Payment System सोबत UPI जोडण्यात आले आहे.
१०. कतार : कतार नॅशनल बँकेशी संबंधित व्यापारी केंद्रे, काही हॉटेल्स आणि विमानतळांवर UPI पेमेंट स्वीकारले जाते.
११. ग्रीस : Eurobank सोबतच्या भागीदारीतून ग्रीसमध्ये UPI सेवा सुरू करण्यात आली आहे. यामुळे सहभागी व्यापाऱ्यांकडे डिजिटल पेमेंट करता येते.
https://www.prahaar.in/2026/11/02/private-plane-crashes-in-a-residential-area-in-the-us-9-people-killed-fire-causes-alarm-in-the-vicinity/
आणखी कोणत्या देशांमध्ये UPI सेवा सुरू होणार ?
भारत सरकार आणि NPCI आंतरराष्ट्रीय स्तरावर UPI सेवेचा विस्तार करण्यासाठी प्रयत्नशील आहेत. उज्बेकिस्तानमध्ये UPI सेवा सुरू करण्यासाठी व्यावसायिक करार झाल्याचे वृत्त आहे. तसेच जपान, मलेशिया आणि सायप्रस या देशांमध्येही UPI संदर्भात चाचणी प्रकल्प किंवा सेवा सुरू करण्याच्या हालचाली सुरू आहेत.
परदेशात UPI पेमेंट कसे कराल ?
परदेशात UPI वापरण्यासाठी संबंधित देशात ही सुविधा उपलब्ध असणे आवश्यक आहे. त्यानंतर पुढील बाबी लक्षात घ्या.
– आपल्या UPI ॲपमध्ये UPI International हा पर्याय उपलब्ध आहे का, ते तपासा.
– संबंधित पर्याय सक्रिय करण्याची सुविधा असल्यास तो सुरू करा.
– UPI स्वीकारणाऱ्या दुकानातील QR कोड स्कॅन करा.
– व्यवहाराची रक्कम आणि चलन रूपांतरणाचा तपशील तपासून पेमेंटला संमती द्या.
– व्यवहार पूर्ण झाल्यानंतर आपल्या बँक खात्यातून रक्कम वजा झाल्याची खात्री करा.
भारतीय रुपयांतून होणार व्यवहार; मात्र या गोष्टी लक्षात ठेवा!
परदेशात UPI द्वारे पेमेंट केल्यास रक्कम भारतीय बँक खात्यातून वजा होते. मात्र, व्यवहाराचे मूल्य संबंधित देशाच्या चलनानुसार आणि लागू असलेल्या विनिमय दरानुसार निश्चित केले जाते. त्यामुळे प्रत्यक्ष व्यवहारापूर्वी चलन रूपांतरणाचा दर आणि लागू शुल्क तपासणे महत्त्वाचे आहे. तसेच, UPI सेवा संबंधित देशातील प्रत्येक दुकानात किंवा पर्यटनस्थळी उपलब्ध असेलच असे नाही. ही सुविधा स्थानिक पेमेंट नेटवर्क आणि सहभागी व्यापाऱ्यांवर अवलंबून असते. त्यामुळे परदेशात जाण्यापूर्वी आपल्या UPI ॲपमधील आंतरराष्ट्रीय पेमेंटची सुविधा तपासणे आणि पर्यायी पेमेंट व्यवस्था जवळ ठेवणे फायदेशीर ठरेल.
भारतीय पर्यटकांसाठी UPI ठरणार फायदेशीर
UPI च्या आंतरराष्ट्रीय विस्तारामुळे परदेशात जाणाऱ्या भारतीय पर्यटकांसाठी पेमेंटचा आणखी एक सोयीस्कर पर्याय उपलब्ध झाला आहे. खरेदी, पर्यटनस्थळांची तिकिटे आणि विविध सेवांचे शुल्क भरताना काही ठिकाणी आंतरराष्ट्रीय कार्डवरील अवलंबित्व कमी होऊ शकते. त्यामुळे भारतीय डिजिटल पेमेंट प्रणाली आता जागतिक स्तरावरही आपली ओळख निर्माण करत आहे.