मुंबई : वांद्रे पूर्व येथील गरीब नगर परिसरात पश्चिम रेल्वेने शुक्रवारी 94 उर्वरित बांधकामे पाडली. मुंबई महानगर प्रदेश विकास प्राधिकरणाने (MMRDA) पात्र प्रकल्पग्रस्तांचे पुनर्वसन पूर्ण केल्यानंतर ही कारवाई करण्यात आली. सर्व 94 पात्र कुटुंबांना पर्यायी कायमस्वरूपी घरे देऊन त्यांचा ताबाही सोपवण्यात आला आहे. मे 2026 मध्ये पश्चिम रेल्वेने मोठी निष्कासन मोहीम राबवली होती. मात्र, पात्र कुटुंबांच्या पुनर्वसनासाठी गरीब नगरमधील काही बांधकामे त्यावेळी पाडण्यात आली नव्हती. आता पुनर्वसनाची प्रक्रिया पूर्ण झाल्यानंतर उर्वरित बांधकामे हटवण्यात आली.

https://www.prahaar.in/2026/10/30/tata-capitals-corporate-social-responsibility-initiatives-will-prove-significant-for-the-inclusive-development-of-maharashtra/

उच्च न्यायालयाच्या आदेशानुसार कारवाई

मुंबई उच्च न्यायालयाने 23 ऑक्टोबर 2026 रोजी दिलेल्या आदेशानुसार ही कारवाई करण्यात आली. संबंधित याचिका निकाली काढताना पात्र प्रकल्पग्रस्तांना एका आठवड्यात जागा रिकामी करण्याचे निर्देश न्यायालयाने दिले होते. त्यानंतर रेल्वे प्रशासनाला 48 तासांत पाडकाम पूर्ण करण्यास सांगण्यात आले होते.

वांद्रे टर्मिनसच्या विकासाला मिळणार गती

या जागेवरील अतिक्रमणे हटवल्यामुळे वांद्रे परिसरातील रेल्वे पायाभूत सुविधांच्या विस्ताराला मदत होणार आहे. वांद्रे टर्मिनसच्या पूर्वेकडील भागात एकात्मिक रेल्वे संकुल विकसित करण्याची योजना पश्चिम रेल्वेने आखली आहे. या योजनेत प्लॅटफॉर्म क्रमांक 8 ची उभारणी, गाड्या उभ्या करण्यासाठीच्या सुविधांचा विस्तार, देखभाल यंत्रणेचे आधुनिकीकरण तसेच प्रवाशांच्या सोयी-सुविधांमध्ये सुधारणा यांचा समावेश आहे. प्रवाशांची ये-जा अधिक सुलभ करण्यासाठी होल्डिंग एरिया आणि संबंधित पायाभूत सुविधांचाही विस्तार प्रस्तावित आहे. या प्रकल्पांमुळे वांद्रे परिसरातील रेल्वेची कार्यक्षमता, गाड्यांची हाताळणी क्षमता आणि प्रवाशांना मिळणाऱ्या सुविधांमध्ये सुधारणा होण्याची अपेक्षा पश्चिम रेल्वेने व्यक्त केली आहे.