iPhone Air 2 : Apple च्या अल्ट्रा-स्लिम स्मार्टफोनच्या पुढील मॉडेलची चर्चा पुन्हा सुरू झाली आहे. कंपनीने गेल्या वर्षी लॉन्च केलेल्या iPhone Air चे सर्वात मोठे वैशिष्ट्य म्हणजे त्याची अतिशय पातळ आणि आकर्षक डिझाइन. मात्र, फोनची जाडी कमी ठेवताना कॅमेरा आणि बॅटरीच्या क्षमतेबाबत काही मर्यादा असल्याची चर्चा झाली होती. आता आगामी iPhone Air 2 मध्ये या बाबतीत महत्त्वाचे बदल केले जाण्याची शक्यता वर्तवण्यात येत आहे.

iPhone Air 2 भन्नाट फीचर्स लीक झाले आहेत. त्यानुसार नवीन iPhone Air 2 मध्ये ड्युअल रिअर कॅमेरा सेटअप आणि आधीच्या मॉडेलपेक्षा मोठी बॅटरी मिळू शकते. हा स्मार्टफोन २०२७ मध्ये बाजारात दाखल होण्याची शक्यता आहे. मात्र, Apple ने अद्याप या फोनच्या फीचर्सबाबत अधिकृत घोषणा केलेली नाही.

iPhone Air 2 मध्ये मिळू शकतो १२०Hz डिस्प्ले

लीकनुसार, iPhone Air 2 मध्ये ६.५५ इंचांचा फ्लॅट OLED डिस्प्ले दिला जाऊ शकतो. या स्क्रीनला 1.5K+ रिझोल्यूशन आणि १२०Hz LTPO रिफ्रेश रेटचा सपोर्ट मिळण्याची शक्यता आहे. त्यामुळे फोनवर स्क्रोलिंग करताना, अॅप्स वापरताना आणि इतर कामे करताना अधिक स्मूद अनुभव मिळू शकतो. परफॉर्मन्सच्या बाबतीतही या फोनमध्ये मोठे अपग्रेड पाहायला मिळण्याची शक्यता आहे. iPhone Air 2 मध्ये A20 सीरिजचा चिपसेट दिला जाऊ शकतो. हा प्रोसेसर 2nm तंत्रज्ञानावर आधारित असण्याचा अंदाज आहे. मात्र, प्रोसेसर आणि डिस्प्लेबाबतच्या या माहितीला अद्याप अधिकृत दुजोरा मिळालेला नाही.

बॅटरी क्षमतेत ११ टक्क्यांची वाढ होण्याची शक्यता

iPhone Air 2 मधील संभाव्य बदलांमध्ये बॅटरी हा महत्त्वाचा मुद्दा आहे. लीकनुसार, आगामी फोनमध्ये ३,५००mAh क्षमतेची बॅटरी दिली जाऊ शकते. याउलट, पहिल्या पिढीतील iPhone Air मध्ये ३,१४९mAh क्षमतेची बॅटरी असल्याचे सांगितले जाते.दोन्ही क्षमतांची तुलना केल्यास नवीन मॉडेलच्या बॅटरीमध्ये जवळपास ११ टक्क्यांची वाढ होऊ शकते. त्यामुळे फोनची बॅटरी लाइफ सुधारण्याची अपेक्षा आहे. प्रत्यक्ष वापरात बॅटरी किती काळ टिकेल, हे मात्र फोनचे हार्डवेअर, सॉफ्टवेअर आणि बॅटरी ऑप्टिमायझेशनवर अवलंबून असेल.

https://www.prahaar.in/2026/10/29/samsung-galaxy-a08-launched-in-india-features-a-6000mah-battery-and-6-years-of-security-updates-whats-the-price/

ड्युअल रिअर कॅमेरा सेटअपमुळे फोटोग्राफीमध्ये सुधारणा ?

पहिल्या iPhone Air मध्ये मागील बाजूस एकच कॅमेरा देण्यात आला होता. मात्र, iPhone Air 2 मध्ये ४८ मेगापिक्सेलचा प्रायमरी कॅमेरा आणि नवीन अल्ट्रा-वाइड कॅमेरा दिला जाऊ शकतो, अशी माहिती लीकमधून समोर आली आहे.हा बदल प्रत्यक्षात झाला, तर वापरकर्त्यांना विविध प्रकारचे फोटो काढण्यासाठी अधिक पर्याय मिळू शकतात. याशिवाय, नवीन मॉडेलमध्ये Face ID ची सुविधा मिळण्याचीही शक्यता वर्तवण्यात येत आहे.

iPhone Air 2 कधी होणार लॉन्च ?

मीडिया रिपोर्ट्सनुसार, Apple iPhone Air 2 ला २०२७ च्या वसंत ऋतूमध्ये लॉन्च करू शकते. हा फोन iPhone 18 आणि iPhone 18e यांच्यासोबत सादर केला जाण्याची शक्यता आहे. मात्र, लॉन्चची तारीख आणि उपलब्धतेबाबत कंपनीकडून अद्याप कोणतीही अधिकृत माहिती देण्यात आलेली नाही.

iPhone Air ची किंमत किती होती ?

पहिल्या iPhone Air ची भारतातील सुरुवातीची किंमत १,१९,९०० रुपये होती. त्याच्या वेगवेगळ्या स्टोरेज व्हेरिएंटच्या किमती पुढीलप्रमाणे होत्या :

– 256GB व्हेरिएंट: १,१९,९०० रुपये

– 512GB व्हेरिएंट: १,३९,९०० रुपये

– 1TB व्हेरिएंट: १,५९,९०० रुपये

आगामी iPhone Air 2 ची किंमत किती असेल, याबाबत सध्या कोणतीही ठोस माहिती उपलब्ध नाही. एकूणच, iPhone Air 2 मध्ये मोठी बॅटरी, ड्युअल कॅमेरा आणि सुधारित प्रोसेसर मिळण्याची शक्यता आहे. हे बदल प्रत्यक्षात आले, तर अतिशय पातळ डिझाइनसोबत कॅमेरा आणि बॅटरीच्या बाबतीतही हा फोन अधिक सक्षम ठरू शकतो. मात्र, या सर्व फीचर्ससाठी Apple च्या अधिकृत घोषणेची प्रतीक्षा करावी लागेल.