नवी दिल्ली: भारतीय महिला क्रिकेट संघाची स्टार यष्टीरक्षक-फलंदाज यस्तिका भाटिया हिच्याबाबत एक मोठी बातमी समोर आली आहे. यस्तिका आगामी ‘वुमेन्स बिग बॅश लीग’ मध्ये धमाकेदार पुनरागमन करण्यासाठी पूर्णपणे सज्ज झाली आहे. मिळालेल्या माहितीनुसार, ती जेस जोनासेनच्या जागी ‘ब्रिसबेन हीट’ संघात दुखापत-पर्यायी क्रिकेटपटू म्हणून सामील झाली आहे. विशेष म्हणजे, या संपूर्ण हंगामात या प्रतिष्ठित स्पर्धेत खेळणारी ती 1 मेव भारतीय क्रिकेटपटू असणार आहे, ज्यामुळे भारतीय क्रिकेट चाहत्यांच्या नजरा तिच्या कामगिरीवर असतील.

यस्तिका ‘ब्रिसबेन हीट’ संघात सामील होणार असून, ती आगामी 1 नोव्हेंबर रोजी सिडनीत ‘सिडनी थंडर’विरुद्ध होणाऱ्या त्यांच्या दुसऱ्या सामन्यापासून ते संपूर्ण हंगाम संघासोबत खेळताना दिसणार आहे. आंतरराष्ट्रीय क्रिकेटचा अनुभव पाहता, यस्तिका भाटियाला 4 कसोटी, 28 एकदिवसीय आणि 26 टी-२० आंतरराष्ट्रीय सामने खेळल्याचा मोठा अनुभव पाठीशी आहे. तिने मागील ‘डब्ल्यूबीबीएल 2024’ मध्ये ‘मेलबर्न स्टार्स’साठी 6 सामने खेळले होते. त्या मालिकेत 154 धावा करत ती संघासाठी सर्वाधिक धावा करणारी दुसरी फलंदाज ठरली होती. जरी तिचा स्ट्राईक रेट 104.76 इतका कमी असला, तरी तिने आपल्या खेळाने सर्वांचे लक्ष वेधले होते. यस्तिकाने ऑस्ट्रेलियाच्या मैदानांवर आतापर्यंत 1 कसोटी, 3 एकदिवसीय आणि 2 टी-२० आंतरराष्ट्रीय सामने खेळले आहेत.

https://www.prahaar.in/2026/10/28/bhuvneshwar-kumar-makes-team-india-comeback-after-four-years-shares-first-emotional-reaction/

‘ब्रिसबेन हीट’चे मुख्य प्रशिक्षक मार्क सोरेल यांनी यस्तिकाच्या आगमनावर आनंद व्यक्त केला आहे. ते म्हणाले की, स्पर्धा सुरू होण्याच्या अगदी जवळ असताना इतकी दर्जेदार आणि अनुभवी आंतरराष्ट्रीय खेळाडू संघात मिळणे खूप मोठी गोष्ट आहे. जेसची उणीव नक्कीच जाणवेल, परंतु संघात एक प्रभावी डावखुरी फलंदाज मिळाल्याने मोठा दिलासा मिळाला आहे. यस्तिकाला ऑस्ट्रेलियात आणि ‘ॲलन बॉर्डर फील्ड’वर खेळण्याचा चांगला अनुभव असल्यामुळे ती संघात सहजपणे जुळवून घेईल.

गेल्या वर्षी सप्टेंबरमध्ये झालेल्या दुखापतीमुळे यस्तिकाला सुमारे 18 महिने क्रिकेटपासून दूर राहावे लागले होते. या दुर्दैवी काळामुळे तिला भारताच्या 2025 मधील एकदिवसीय विश्वचषक विजयातही सहभागी होता आले नव्हते. परंतु, तिने जिद्दीने कमबॅक करत जून महिन्यात इंग्लंडमधील टी-२० विश्वचषकाद्वारे आंतरराष्ट्रीय क्रिकेटमध्ये शानदार पुनरागमन केले. त्यानंतर जुलै महिन्यात इंग्लंडविरुद्धच्या ऐतिहासिक सामन्यात तिने लॉर्ड्सच्या मैदानावर शानदार कसोटी शतक झळकावत नवा इतिहास रचला. या दणदणीत सामन्यात भारताने इंग्लंडवर 270 धावांनी मोठा विजय मिळवला होता. आता ‘डब्ल्यूबीबीएल’ मध्ये यस्तिका काय कमाल दाखवते, याकडे सर्वांचे लक्ष लागले आहे.