Cyclone Arnab : अत्यंत तीव्र चक्रीवादळ अर्नबने बुधवारी पहाटे आंध्र प्रदेश आणि यानम किनारपट्टीवर धडक दिली. पहाटे दोन ते सकाळी आठ या वेळेत वादळाने किनारा ओलांडला. यावेळी वाऱ्याचा वेग ताशी १२५ ते १३५ किलोमीटर होता, तर झोत ताशी १५० किलोमीटरपर्यंत पोहोचला. सकाळी साडेआठ वाजेपर्यंत वादळाचे केंद्र पूर्णपणे जमिनीवर आले आणि त्यानंतर वादळ ‘तीव्र चक्रीवादळ’ या श्रेणीत कमकुवत झाले.

सकाळी वादळाचे केंद्र नरसापूरपासून सुमारे २० किलोमीटर ईशान्येस, यानमपासून ४० किलोमीटर नैऋत्येस आणि काकिनाडापासून ६० किलोमीटर नैऋत्येस होते. यावेळी केंद्राजवळ वाऱ्याचा वेग ताशी ११० ते १२० किलोमीटर, तर झोत १३५ किलोमीटरपर्यंत होता. पुढील ४८ तासांत वादळ उत्तर-वायव्य दिशेने सरकत आणखी कमकुवत होईल, असा अंदाज आहे.

https://www.prahaar.in/2026/10/28/what-is-the-future-path-of-cyclone-arnab-key-forecast-regarding-its-impact-on-lucknow-and-gorakhpur/

दुपारपर्यंत ते सामान्य चक्रीवादळात आणि संध्याकाळपर्यंत खोल कमी दाबाच्या क्षेत्रात बदलेल. वादळामुळे अनेक ठिकाणी झाडे उन्मळून पडली आणि वीजपुरवठा खंडित झाला. आतापर्यंत कोणतीही जीवितहानी झाल्याचे वृत्त नाही. एक लाख ३६ हजारांहून अधिक लोकांना सुरक्षित ठिकाणी हलवण्यात आले आहे. १२ गाड्या रद्द करण्यात आल्या, तर ५३ मार्गांवरील सेवा थांबवण्यात आल्या. आंध्र प्रदेशात चार अतिरिक्त राष्ट्रीय आपत्ती प्रतिसाद पथके तैनात करण्यात आली असून राज्यातील ८० पथके मदतकार्यात गुंतली आहेत. पुढील दोन दिवस आंध्र प्रदेश, ओडिशा, तेलंगणा आणि छत्तीसगडमध्ये मुसळधार पावसाचा इशारा देण्यात आला आहे.