पुणे : पुण्यातील स्वारगेट परिसरात अपोलो हॉस्पिटलसमोर धावत्या इलेक्ट्रिक शिवाई बसला अचानक भीषण आग लागल्याची घटना समोर आली आहे. या बसमध्ये 17 प्रवासी होते. चालकाने प्रसंगावधान राखत बस बाजूला घेतल्याने आणि प्रवाशांना तातडीने बाहेर काढल्याने मोठी दुर्घटना टळली. या घटनेमुळे परिसरात काही काळ खळबळ उडाली, तर रस्त्यावर धुराचे मोठे लोट पसरले होते.
चालकाच्या प्रसंगावधानामुळे मोठा अनर्थ टळला
मिळालेल्या माहितीनुसार, इलेक्ट्रिक शिवाई बस स्वारगेटच्या दिशेने जात असताना अचानक बसमधून धूर निघू लागला. काही क्षणांतच आगीच्या ज्वाळा दिसू लागल्याने चालकाने बस रस्त्याच्या बाजूला घेतली. त्यानंतर बसमधील 17 प्रवाशांना तातडीने खाली उतरवण्यात आले. त्यामुळे सर्व प्रवाशांचा जीव थोडक्यात बचावला.
View this post on Instagram
अग्निशमन दलाकडून आगीवर नियंत्रण
घटनेची माहिती मिळताच अग्निशमन दलाचे जवान, पोलीस आणि स्थानिक नागरिक मदतीसाठी घटनास्थळी दाखल झाले. अग्निशमन दलाने पाण्याचा मारा करत आगीवर नियंत्रण मिळवले. दरम्यान, पोलिसांनी गर्दी नियंत्रित करून वाहतूक सुरळीत करण्यासाठी प्रयत्न केले. आगीमुळे परिसरात काही काळ वाहतुकीचा खोळंबा झाला होता.
https://www.prahaar.in/2026/10/26/mumbai-local-train-disrupted-unknown-object-on-ohe-between-thane-mulund-signal-failure-causes-delay/
शॉर्ट सर्किटचा प्राथमिक अंदाज
बसला आग नेमकी कशामुळे लागली, याचे कारण अद्याप स्पष्ट झालेले नाही. प्राथमिक अंदाजानुसार शॉर्ट सर्किटमुळे आग लागली असावी, अशी शक्यता व्यक्त केली जात आहे. मात्र, आगीचे नेमके कारण तपासानंतरच स्पष्ट होईल. धावत्या इलेक्ट्रिक बसला आग लागल्याच्या या घटनेमुळे सार्वजनिक वाहतुकीतील वाहनांची देखभाल आणि सुरक्षिततेचा प्रश्न पुन्हा चर्चेत आला आहे.