Jalgaon : सणासुदीच्या काळात रेल्वे गाड्यांमध्ये होणारी प्रवाशांची गर्दी लक्षात घेऊन मध्य रेल्वेने जळगाव ते पानिपतदरम्यान विशेष रेल्वे चालविण्याचा निर्णय घेतला आहे. या विशेष गाडीमुळे जळगाव, भुसावळ आणि मार्गावरील इतर स्थानकांमधून उत्तर भारतात प्रवास करणाऱ्या प्रवाशांना दिलासा मिळणार आहे. नवी दिल्लीच्या दिशेने जाणाऱ्या प्रवाशांसाठीही ही सेवा उपयुक्त ठरणार आहे.

जळगावहून २१ ऑक्टोबरला विशेष ट्रेन रवाना

रेल्वेच्या नियोजित वेळापत्रकानुसार, गाडी क्रमांक ०१०६७ जळगाव-पानिपत विशेष रेल्वे बुधवार, २१ ऑक्टोबर रोजी सायंकाळी ६ वाजता जळगाव स्थानकातून सुटणार आहे. ही गाडी गुरुवारी, २२ ऑक्टोबर रोजी दुपारी ४ वाजता पानिपत स्थानकावर पोहोचणार आहे. परतीच्या प्रवासात गाडी क्रमांक ०१०६८ पानिपत-जळगाव विशेष रेल्वे गुरुवार, २२ ऑक्टोबर रोजी सायंकाळी ७ वाजता पानिपत येथून सुटेल. शुक्रवारी, २३ ऑक्टोबर रोजी दुपारी ४ वाजून ४० मिनिटांनी ही गाडी जळगाव स्थानकावर पोहोचेल. या विशेष रेल्वेमुळे सणासुदीच्या काळात प्रवाशांना प्रवासासाठी आणखी एक पर्याय उपलब्ध होणार आहे.

भुसावळसह अनेक महत्त्वाच्या स्थानकांवर थांबे

जळगाव ते पानिपतदरम्यान धावणाऱ्या या विशेष रेल्वेला मार्गावरील अनेक प्रमुख स्थानकांवर थांबे देण्यात आले आहेत. यामध्ये भुसावळ, खंडवा, भोपाळ, बिना, आग्रा कॅन्ट, पलवल आणि नवी दिल्ली या स्थानकांचा समावेश आहे. या थांब्यांमुळे महाराष्ट्रातून मध्य प्रदेश, दिल्ली आणि उत्तर भारताच्या दिशेने जाणाऱ्या प्रवाशांना या सेवेचा लाभ घेता येणार आहे.

https://www.prahaar.in/2026/10/21/nashik-crimefake-signature-of-the-district-collector-used-in-nashik-bogus-certificate-submitted-for-petrol-pump-approval-case-registered/

विशेष रेल्वेला एकूण १९ डबे

या गाडीमध्ये प्रवाशांच्या सोयीसाठी विविध श्रेणींचे एकूण १९ डबे जोडण्यात येणार आहेत. त्यांची रचना पुढीलप्रमाणे असेल.

– शयनयान श्रेणीचे १० डबे

– सामान्य द्वितीय श्रेणीचे ७ डबे

– द्वितीय आसन श्रेणीसह गार्ड ब्रेक व्हॅनचे २ डबे

सामान्य द्वितीय श्रेणीचे सात डबे असल्यामुळे अनारक्षित तिकिटांवर प्रवास करणाऱ्या प्रवाशांनाही अतिरिक्त सुविधा मिळण्याची अपेक्षा आहे.

‘रेलवन’ ॲपवरून तिकीट बुकिंगची सुविधा

या विशेष रेल्वेने प्रवास करू इच्छिणाऱ्या प्रवाशांना तिकीट उपलब्धता आणि आरक्षणाची माहिती तपासून प्रवासाचे नियोजन करता येईल. तिकीट बुकिंगसाठी ‘रेलवन’ ॲपचा वापर करता येणार आहे. तसेच गाडीचे वेळापत्रक, विविध स्थानकांवरील आगमन आणि प्रस्थानाची वेळ जाणून घेण्यासाठी भारतीय रेल्वेचे अधिकृत संकेतस्थळ आणि एनटीईएस (राष्ट्रीय रेल्वे चौकशी प्रणाली) ॲपचा वापर करता येईल.

प्रवाशांनी प्रवासाला निघण्यापूर्वी रेल्वेचे अधिकृत वेळापत्रक आणि तिकीट उपलब्धता तपासून घ्यावी.