नवी दिल्ली : भारताच्या पारंपरिक आणि पौष्टिक अन्नपदार्थांनी आता जागतिक पातळीवर आपली पाळेमुळे घट्ट करण्यास सुरुवात केली आहे. याच पार्श्वभूमीवर, केंद्र सरकारच्या वाणिज्य आणि उद्योग मंत्रालयांतर्गत कार्यरत असलेल्या कृषी आणि प्रक्रिया-युक्त अन्न उत्पादने निर्यात विकास प्राधिकरणाद्वारे तामिळनाडूच्या इरोड जिल्ह्यातून तब्बल 1.755 मेट्रिक टन सेंद्रिय पामिरा गूळ पावडरची पहिली ऐतिहासिक खेप बल्गेरियातील ‘वर्ना’ शहराकडे दिमाखात रवाना करण्यात आली आहे. एनपीओपी आणि युरोपियन युनियनद्वारे प्रमाणित केलेली ही उत्पादने भारताच्या कृषी निर्यातीला एक नवी दिशा देणारी ठरत आहेत.
उत्पादनाची निर्मिती आणि आंतरराष्ट्रीय भागीदारी
इरोड येथील ‘मेसर्स वेलबीइंग फूड्स’ने चेन्नईच्या ‘मेसर्स चेट्टी एक्सपोर्ट्स’च्या सहकार्याने ही दर्जेदार गूळ पावडर तयार केली आहे. चेन्नई बंदरावरून सागरी मार्गे पाठवली जाणारी ही खेप बल्गेरियातील ‘मेसर्स सो लाईफ लिमिटेड’ या आयातदार कंपनीच्या माध्यमातून युरोपियन बाजारपेठेत पोहोचणार आहे. ताडाच्या फुलातील मकरंदापासून पारंपरिक पद्धतीने बनवलेली ही पावडर शुद्ध साखरेला एक उत्तम आणि आरोग्यदायी पर्याय ठरणार असून, यात शरीरासाठी आवश्यक असणारी विविध जीवनसत्त्वे व खनिजद्रव्ये मोठ्या प्रमाणावर समाविष्ट आहेत.
शेतकऱ्यांच्या उत्पन्नात वाढ आणि शाश्वत उपजीविका
या महत्त्वाकांक्षी उपक्रमामुळे तामिळनाडूमधील ताडापासून बनवल्या जाणाऱ्या उत्पादनांची बाजारपेठ अधिक मजबूत झाली आहे. सध्या सुमारे 137 एकर क्षेत्रावर सेंद्रिय शेती केली जात असून, या निर्यातभिमुख मूल्य साखळ्यांमुळे स्थानिक शेतकऱ्यांना मोठा आर्थिक फायदा मिळत आहे. स्थानिक बाजारपेठेच्या तुलनेत शेतकऱ्यांच्या उत्पन्नात सुमारे पंधरा ते बावीस टक्क्यांपर्यंत वाढ झाली आहे, ज्यामुळे उत्पादकांचे जीवनमान उंचावून शाश्वत उपजीविकेला बळकटी मिळत असल्याचे दिसून येत आहे.
https://www.prahaar.in/category/mahamumbai/
अपेडाचा पुढाकार आणि जागतिक बाजारपेठेतील विस्तार
अपेडाचे अध्यक्ष अभिषेक देव यांच्या हस्ते हिरवा झेंडा दाखवून या महत्त्वाच्या मालवाहतुकीचा प्रारंभ करण्यात आला. याप्रसंगी अपेडाच्या सचिव डॉ. शाश्वती बोस यांच्यासह अनेक वरिष्ठ अधिकारी व शेतकरी वर्ग मोठ्या संख्येने उपस्थित होता. या ऐतिहासिक निर्यातीमुळे भारताच्या पारंपरिक उत्पादनांचे आंतरराष्ट्रीय बाजारपेठेतील स्थान आणखी मजबूत होईल आणि जगातील इतर देशांमध्येही अशा प्रकारच्या सेंद्रिय व मूल्यवर्धित उत्पादनांसाठी नवीन दारे खुली होतील, असा ठाम विश्वास व्यक्त केला जात आहे.