नवी दिल्ली : जपानमधील आयची-नागोया येथे पार पडलेल्या आशियाई क्रीडा स्पर्धा 2026 मध्ये भारताच्या खेळाडूंनी इतिहास रचला आहे. भारताने या महाउत्सवात तुफानी कामगिरी करत पदकतालिकेत चौथे स्थान पटकावले आहे. या ऐतिहासिक यशानंतर आता देशाचे पंतप्रधान नरेंद्र मोदी गुरुवारी, 15 ऑक्टोबर रोजी नवी दिल्लीतील मेजर ध्यानचंद राष्ट्रीय स्टेडियममध्ये थेट खेळाडूंशी संवाद साधणार आहेत. सायंकाळी सुमारे 4:30 वाजता हा विशेष कार्यक्रम पार पडणार असून, यामध्ये पंतप्रधान खेळाडूंशी बातचीत करून उपस्थितांना संबोधित करणार आहेत. या भव्य सोहळ्यात भारतीय पथकातील शिलेदार, त्यांचे मार्गदर्शक (प्रशिक्षक), सहाय्यक कर्मचारी, भारतीय ऑलिम्पिक संघटनेचे पदाधिकारी, राष्ट्रीय क्रीडा महासंघांचे प्रतिनिधी तसेच युवा कार्यक्रम आणि क्रीडा मंत्रालयाचे अधिकारी मोठ्या संख्येने उपस्थित राहणार आहेत.

भारताची ऐतिहासिक आणि रेकॉर्डब्रेक कामगिरी

यंदाच्या आशियाई क्रीडा स्पर्धेत भारतीय खेळाडूंनी अफाट पराक्रम गाजवत एकूण 85 पदकांची कमाई केली. यामध्ये 21 सुवर्ण, 27 रौप्य आणि 37 कांस्य पदकांचा समावेश आहे. विशेष म्हणजे, भारताने सलग दुसऱ्यांदा या स्पर्धेच्या पहिल्या पाच देशांमध्ये आपले स्थान पक्के केले असून, भारतीय खेळाडूंची जागतिक स्तरावरील वाढती स्पर्धात्मक क्षमता यावरून स्पष्ट होते. या स्पर्धेतील काही कामगिरी तर खरोखरच अंगावर शहारे आणणाऱ्या आहेत. तिरंदाजीच्या रिकर्व्ह प्रकारात भारताने अभूतपूर्व यश मिळवले. तसेच, ऐतिहासिक पाऊल उचलत भारतीय पुरुष आणि महिला दोन्ही हॉकी संघांनी एकाच स्पर्धेत सुवर्णपदक पटकावून तिरंगा फडकवला. याशिवाय, सॉफ्ट टेनिस आणि मिक्स्ड मार्शल आर्ट्स (एमएमए) यांसारख्या कठीण क्रीडा प्रकारांत भारताने प्रथमच पदकांची कमाई करत नवीन पाऊलवाट तयार केली.

https://www.prahaar.in/2026/10/14/shreyas-iyer-achieves-career-best-4th-rank-latest-icc-t20i-rankings/

पदकांचा दुष्काळ संपला!

महिला ट्रॅप प्रकारात भारताने प्रथमच सुवर्णपदकाचा मान मिळवला. दुसरीकडे, भारोत्तोलनात तब्बल 28 वर्षांच्या मोठ्या खंडानंतर भारताला आशियाई क्रीडा स्पर्धेत रौप्यपदक मिळाले. ग्रीको-रोमन कुस्तीमध्येही भारतीय मल्लाने रौप्यपदक जिंकत तब्बल 64 वर्षांनंतर या प्रकारात अंतिम फेरीत धडक मारण्याची ऐतिहासिक कामगिरी केली. भारतीय पथकाच्या या अभूतपूर्व आणि प्रेरणादायी यशाचा गौरव करण्यासाठीच पंतप्रधान नरेंद्र मोदी स्वतः खेळाडूंशी संवाद साधणार आहेत. या संवादातून खेळाडूंना आणखी प्रोत्साहन मिळेल आणि भविष्यातील स्पर्धांसाठी ते अधिक जोमाने सज्ज होतील, यात शंका नाही.