दुबई : आंतरराष्ट्रीय क्रिकेट परिषदेने (आयसीसी) सप्टेंबर महिन्यासाठी ‘प्लेअर ऑफ द मंथ’ पुरस्कारांची घोषणा केली असून, पुरुष आणि महिला दोन्ही गटांमध्ये भारतीय क्रिकेटपटूंनी बाजी मारत भारताचा तिरंगा डौलाने फडकवला आहे. पुरुष गटात भारतीय संघाचा कर्णधार शुभमन गिल याला हा बहुमान मिळाला आहे, तर महिला गटात स्फोटक फलंदाज शफाली वर्मा हिने ‘प्लेअर ऑफ द मंथ’चा पुरस्कार पटकावला आहे. या दोन्ही खेळाडूंनी आपापल्या उत्कृष्ट कामगिरीच्या बळावर हा ऐतिहासिक बहुमान मिळवला आहे.

शुभमन गिलचा विक्रम आणि शानदार कामगिरी

सप्टेंबर महिन्यात शुभमन गिलने वेस्ट इंडिजविरुद्धच्या एकदिवसीय मालिकेत धावांचा डोंगर उभा केला. गिलने पहिल्या दोन एकदिवसीय सामन्यांमध्ये मिळून तब्बल 333 धावा फटकावल्या. पहिल्या सामन्यात त्याने शानदार शतक झळकावले, तर दुसऱ्या सामन्यात नाबाद द्विशतक झळकावून क्रिकेट जगतात नवा इतिहास रचला. त्याच्या या लाजवाब खेळीच्या जोरावर भारताने दोन्ही सामने सहज जिंकले. शुभमन गिलचा हा कारकिर्दीतील पाचवा आयसीसी ‘मेन्स प्लेयर ऑफ द मंथ’ पुरस्कार आहे. यापूर्वी त्याने जानेवारी 2023, सप्टेंबर 2023, फेब्रुवारी 2025 आणि जुलै 2025 मध्ये हा किताब जिंकला होता. या विक्रमासह त्याने पुरुष गटात सर्वाधिक वेळा हा सन्मान पटकावण्याचा आपला विक्रम आणखी मजबूत केला आहे. पुरस्कार स्वीकारताना गिल म्हणाला, “पाचव्यांदा हा पुरस्कार जिंकणे हा एक अद्भुत अनुभव आहे. या सन्मानाबद्दल मी परीक्षकांचा मनापासून आभारी आहे.”

https://www.prahaar.in/2026/10/13/wasim-jaffer-slams-yashasvi-jaiswal-wicketkeeping-calls-it-joke/

शफाली वर्माची अष्टपैलू कमाल

महिला गटात भारताची आक्रमक सलामीवीर शफाली वर्मा हिने सप्टेंबर महिन्यात आपल्या उत्कृष्ट खेळाने सर्वांचे लक्ष वेधून घेतले. शफालीने हा पुरस्कार दुसऱ्यांदा आपल्या नावावर केला आहे. यापूर्वी नोव्हेंबर 2025 मध्ये एकदिवसीय विश्वचषक विजयानंतर तिला हा बहुमान मिळाला होता. सप्टेंबर महिन्यात शफालीने 7 टी-20 आंतरराष्ट्रीय सामन्यांमध्ये 72 च्या सरासरीने आणि 184.61 च्या उच्च स्ट्राइक रेटने 360 धावा कुटल्या. एवढेच नव्हे तर, गोलंदाजीतही अप्रतिम चमक दाखवत तिने 6 बळी टिपले. आशिया कप स्पर्धेत पाच डावांत 236 धावा करत ती सर्वाधिक धावा करणारी फलंदाज ठरली. बांगलादेशविरुद्धच्या उपांत्य सामन्यात 64 आणि श्रीलंकेविरुद्धच्या अंतिम सामन्यात 68 धावांची महत्त्वपूर्ण खेळी करत तिने भारताला सलग आठवे आशिया कप विजेतेपद मिळवून देण्यात मोलाची भूमिका बजावली. त्यानंतर नागोया येथील आशियाई क्रीडा स्पर्धेतही तिने तीन डावांत 188 धावा केल्या. दोनोदा हा पुरस्कार मिळवण्याबाबत बोलताना शफाली म्हणाली, “आयसीसी प्लेयर ऑफ द मंथ पुरस्कार जिंकणे हा एक अविश्वसनीय सन्मान आहे. आशिया कप आणि आशियाई खेळांमधील भारताच्या विजयात योगदान देणे अत्यंत समाधानकारक होते.” तसेच, पुढील वर्षी होणाऱ्या आयसीसी महिला चॅम्पियन्स ट्रॉफीसाठी आपण उत्सुक असल्याचे तिने सांगितले.