जयपूर : भारतीय क्रिकेट संघ लवकरच न्यूझीलंड दौऱ्यावर जाणार आहे, मात्र या दौऱ्याच्या काही दिवस आधीच युवा फलंदाज साई सुदर्शनच्या दुखापतीमुळे भारताची चिंता वाढली आहे. जयपूर येथे राजस्थानविरुद्ध सुरू असलेल्या रणजी ट्रॉफीच्या सामन्यात तामिळनाडूकडून खेळताना साई सुदर्शनला क्षेत्ररक्षण करताना तंदुरुस्तीची समस्या जाणवली.

सामन्यादरम्यान नेमके काय घडले?

सामन्याच्या दुसऱ्या दिवशी, क्षेत्ररक्षण करताना साई सुदर्शनला दुखापत झाली. गोलंदाज पी. सरवण कुमारच्या गोलंदाजीवर फलंदाज करण लांबाने कव्हरच्या दिशेने फटका मारला, जो अडवण्याचा प्रयत्न करताना सुदर्शन जमिनीवर पडला. यानंतर त्याला चालताना त्रास होऊ लागला आणि तो वेदनेत असल्याचे स्पष्ट दिसत होते. मैदान सोडताना त्याला सपोर्ट स्टाफच्या सदस्याची मदत घ्यावी लागली.

दुखापतींचे सावट आणि न्यूझीलंड दौरा

साई सुदर्शन नुकताच पुदुचेरीमध्ये ऑस्ट्रेलिया ‘अ’ संघाविरुद्धच्या मालिकेदरम्यान झालेल्या पायाच्या बोटाच्या दुखापतीतून सावरला होता. 24 वर्षीय हा अव्वल फळीतील फलंदाज मागील काही काळापासून सतत दुखापतींशी झुंजत आहे. यापूर्वी विजय हजारे ट्रॉफीदरम्यान झालेल्या बरगडीच्या दुखापतीमुळे तो महिनाभर मैदानाबाहेर होता. त्यानंतर पायाच्या बोटाच्या स्ट्रेस फ्रॅक्चरमुळे त्याला श्रीलंका दौऱ्यावरील कसोटी संघातूनही मुकावे लागले होते. आगामी न्यूझीलंड दौऱ्यासाठी भारत ‘अ’ संघात सुदर्शनचा समावेश करण्यात आला आहे. न्यूझीलंडविरुद्धचे हे सामने 24 ऑक्टोबरपासून लिंकन येथे सुरू होणार आहेत.

https://www.prahaar.in/2026/10/12/denmark-open-pv-sindhu-lakshya-sen-tough-first-round-opponents/

पुनरागमनाची धडपड

राजस्थानविरुद्धचा रणजी सामना खेळण्यासाठी सुदर्शनने ऑस्ट्रेलिया ‘अ’ विरुद्धचा तिसरा एकदिवसीय सामना टाळला होता. शेवटच्या क्षणी त्याचा तामिळनाडूच्या प्लेइंग इलेव्हनमध्ये समावेश करण्यात आला होता. न्यूझीलंडविरुद्धच्या महत्त्वाच्या मालिकेपूर्वी तो शक्य तितक्या लवकर पूर्ण तंदुरुस्ती मिळवण्यावर लक्ष केंद्रित करत आहे. भारतीय संघाच्या दृष्टीने सुदर्शनची तंदुरुस्ती अत्यंत महत्त्वाची ठरणार आहे.