मुंबई : जवाहरलाल नेहरू विद्यापीठातील (जेएनयू) ११ विद्यार्थिनींच्या लैंगिक शोषणाच्या आरोपांवरून भारतीय जनता पक्षाच्या महिला मोर्चाने शनिवारी मुंबईत काँग्रेसविरोधात आंदोलन केले. भाजपच्या प्रदेश कार्यालयापासून काँग्रेस कार्यालयापर्यंत धडक मोर्चा काढत काँग्रेसच्या वरिष्ठ नेतृत्वाने या प्रकरणावर भूमिका स्पष्ट करावी, अशी मागणी भाजपच्या महिला प्रदेशाध्यक्ष आमदार चित्रा वाघ यांनी केली. आंदोलनादरम्यान पोलिसांनी कार्यकर्त्यांना ताब्यात घेतल्याची माहितीही वाघ यांनी दिली.

काँग्रेस खासदार डॉ. बिमोल अकोइजम यांच्यावरील विद्यार्थिनींच्या लैंगिक शोषणाचे आरोप आणि त्यासंदर्भातील कारवाईचा मुद्दा उपस्थित करत वाघ यांनी राहुल गांधी, सोनिया गांधी आणि प्रियंका गांधी यांच्यावर टीका केली. संबंधित खासदाराला चौकशीनंतर सेवेतून बडतर्फ करण्यात आल्याचा दावा करत, या प्रकरणावर काँग्रेसचे वरिष्ठ नेतृत्व मौन का बाळगून आहे, असा सवाल त्यांनी केला. ‘लडकी हूँ, लड सकती हूँ’ अशी घोषणा देणाऱ्या प्रियंका गांधी यांनी या प्रकरणातील पीडित विद्यार्थिनींसाठी भूमिका घ्यावी, अशी मागणीही वाघ यांनी केली. राहुल गांधी यांच्या ‘मोहब्बत की दुकान’ या घोषणेचा संदर्भ देत, महिलांच्या सुरक्षेच्या प्रश्नावर काँग्रेसने उत्तर द्यावे, असे आव्हान त्यांनी दिले.

https://www.prahaar.in/2026/10/10/we-will-capture-every-single-drop-of-water-to-make-maharashtra-drought-free-chief-minister-devendra-fadnavis/

आंदोलनाच्या माध्यमातून भाजप महिला मोर्चाने दोन प्रमुख मागण्या मांडल्या. संबंधित खासदाराचा तातडीने राजीनामा घेऊन त्यांची काँग्रेस पक्षातून हकालपट्टी करावी, तसेच केंद्रीय गृहमंत्री अमित शाह यांनी या प्रकरणात भारतीय न्याय संहितेच्या (बीएनएस) तरतुदींनुसार तातडीने प्रथम माहिती अहवाल (एफआयआर) दाखल करून कठोर कारवाई करण्यासाठी पावले उचलावीत, अशी मागणी करण्यात आली. भाजपच्या मुंबई महिला मोर्चाच्या अध्यक्ष योजना ठोकळे आणि त्यांच्या सहकाऱ्यांच्या उपस्थितीत हे आंदोलन करण्यात आले. पोलिसांनी कार्यकर्त्यांना ताब्यात घेतले असले, तरी अन्यायाविरोधातील लढा सुरूच राहील, असा इशाराही चित्रा वाघ यांनी दिला.