मुंबई: विधान परिषदेच्या पाच जागा एकत्रितपणे लढवण्याचा निर्णय घेतल्यानंतर काही दिवसांतच महाविकास आघाडीतील मतभेद चव्हाट्यावर आले आहेत. अमरावती शिक्षक आणि मराठवाडा पदवीधर मतदारसंघांत मविआतील घटकपक्षांनी परस्परांच्या उमेदवारांविरोधात अर्ज दाखल केल्याने मैत्रिपूर्ण लढतीची शक्यता निर्माण झाली आहे. अमरावतीत काँग्रेस आणि उबाठा, तर मराठवाड्यात उबाठा आणि राष्ट्रवादी काँग्रेस शरद पवार गट आमनेसामने आले आहेत. उमेदवारी अर्ज मागे घेण्याची मुदत 9 ऑक्टोबरला संपणार असल्याने या दोन मतदारसंघांतील पेच सोडविण्यासाठी आघाडीतील नेत्यांकडे अवघे काही तास शिल्लक राहीले आहेत.

विधान परिषदेच्या पदवीधर आणि शिक्षक मतदारसंघातील पाच जागांसाठी 23 ऑक्टोबरला मतदान होणार आहे. पुणे पदवीधर, नागपूर पदवीधर आणि पुणे शिक्षक या तीन मतदारसंघांत आघाडीतील जागावाटपावर सध्या तुलनेने सहमती आहे. मात्र, अमरावती आणि मराठवाड्यातील उमेदवारीवरून तिन्ही पक्षांतील समन्वयाची परीक्षा सुरू झाली आहे. उमेदवारी अर्ज दाखल करण्याची अंतिम मुदत मंगळवारी संपली असून, आता 9 ऑक्टोबरपर्यंत अर्ज मागे घेता येणार आहेत. काँग्रेसने अमरावती शिक्षक मतदारसंघातून अदिती पोहरे यांना उमेदवारी दिली आहे. उबाठाने दत्तात्रय लहाने यांना रिंगणात उतरवून 6 ऑक्टोबरला त्यांचा अर्जही दाखल केला. काँग्रेसने 3 ऑक्टोबरला पोहरे यांच्यासह नागपूर पदवीधरमधून विद्यमान आमदार अभिजित वंजारी आणि पुणे शिक्षकमधून जयंत आसगावकर यांच्या उमेदवारीची घोषणा केली होती.

https://www.prahaar.in/2026/10/08/ration-distribution-criteria-announced-for-265-drought-hit-talukas/

अदिती पोहरे या शिवाजी शिक्षण संस्थेचे अध्यक्ष हर्षवर्धन देशमुख यांच्या कन्या असून उमेदवारी जाहीर होण्यापूर्वीच त्यांनी काँग्रेसमध्ये प्रवेश केला होता. संस्थेच्या कर्मचारीवर्गात मोठ्या संख्येने शिक्षक असल्याने शिक्षक मतदारसंघात त्यांना स्थानिक पातळीवर आधार मिळण्याची शक्यता काँग्रेसकडून व्यक्त केली जात आहे. मात्र, उबाठानेही अमरावतीवरील दावा कायम ठेवला आहे. अमरावती आणि मराठवाडा या दोन्ही जागांवर उबाठाचे उमेदवार राहतील, अशी भूमिका त्यांनी घेतली आहे.

दुसरीकडे, मराठवाडा पदवीधर मतदारसंघातील चित्र आणखी गुंतागुंतीचे झाले आहे. उबाठाने दिलीप घुगे यांना उमेदवारी देऊन 5 ऑक्टोबरला त्यांचा अर्ज दाखल केला. त्यानंतर दुसऱ्याच दिवशी राष्ट्रवादी काँग्रेसच्या शरद पवार गटाने डॉ. प्रतापसिंह पाटील यांची उमेदवारी जाहीर केली. मराठवाडा पदवीधर मतदारसंघ हा पारंपरिकदृष्ट्या राष्ट्रवादी काँग्रेसचा राहिला असून, या पक्षाने सलग तीन वेळा येथे विजय मिळवला आहे, असा दावा शरद पवार गटातील स्थानिक नेत्यांकडून करण्यात आला. त्यामुळे ही जागा आपल्या पक्षाला मिळावी, अशी त्यांची भूमिका आहे. अमरावतीबाबत शरद पवार गटाची भूमिका अद्याप स्पष्ट झालेली नाही. पक्षाच्या एका जिल्हाध्यक्षाने लहाने यांच्या उमेदवारी अर्ज दाखल करण्याच्या कार्यक्रमाला उपस्थिती लावली; मात्र पक्षाच्या वरिष्ठ नेतृत्वाने अद्याप अंतिम निर्णय घेतलेला नसल्याचे स्थानिक नेत्यांकडून सांगण्यात आले.

https://www.prahaar.in/2026/10/08/mcoca-to-be-invoked-in-cases-of-sex-determination-and-female-foeticide/

9 ऑक्टोबरपर्यंत तोडग्याची संधी

महाविकास आघाडीतील मतभेदांबाबत सुप्रिया सुळे यांनी आघाडीत नाराजी नसून चर्चेतून प्रश्न सुटेल, अशी भूमिका मांडली आहे. दुसरीकडे संजय राऊत यांनी मराठवाडा जागेवरील शरद पवार गटाचा दावा मान्य नसल्याचे स्पष्ट केले आहे. २३ ऑक्टोबरच्या पाचही जागांच्या निवडणुकीत एकत्र लढण्याचा निर्णय आघाडीतील प्रमुख नेत्यांच्या बैठकीत झाला होता. मात्र, अंतिम जागावाटपावर तोडगा निघण्यापूर्वीच दोन मतदारसंघांत घटकपक्षांचे उमेदवार रिंगणात उतरले आहेत. त्यामुळे अमरावतीत काँग्रेस-उबाठा आणि मराठवाड्यात उबाठा-शरद पवार गट यांच्यातील संभाव्य मैत्रिपूर्ण लढत टाळण्यासाठी आघाडीच्या नेतृत्वाकडे ९ ऑक्टोबरपर्यंतच वेळ आहे.