सध्या सोशल मीडियावर अनवाणी पायाने साडी नेसून धावत असलेल्या एका महिलेचा व्हिडिओ चांगलाच वायरल होतोय. ही व्हिडिओ आहे झारखंड येथील. झारखंड येथील रामगढ जिल्ह्यातील दुल्मी ब्लॉकमधील सोसो गावात राहणाऱ्या कविता कुमारी नावाच्या महिलेने अनवाणी पायांनी १६०० मीटरची शारीरिक क्षमता चाचणी पूर्ण करून अनेक महिलांना प्रेरणा दिली आहे. होमगार्ड भरतीसाठी झालेल्या या चाचणीतील हा व्हिडिओ एका प्रेक्षकाने चित्रित करून सोशल मीडियावर पोस्ट केला. सोशल मीडियावरील इतर पोस्टनुसार, प्रचंड उष्णता आणि मर्यादित संसाधने असूनही, कविताने ही शर्यत निर्धारित १० मिनिटांच्या मर्यादेच्या आत, केवळ सहा मिनिटांत पूर्ण केली.
कविता कुमारी यांच्या कुटुंबात दोन लहान मुलं आणि वृद्ध सासू सासरे आहेत. घरखर्च भागवण्यासाठी विटभट्टीमध्ये त्या काम करतात. शर्यतीसाठी लागणारे रनिंग शूज, ट्रॅकसूट किंवा इतर साहित्य विकत घेणे त्यांना परवडणारे नव्हते. उओलब्ध असलेल्या तुटपुंज्या साधनांच्या जोरावर त्या भरतीची तयारी करत होत्या. रोज पहाटे ४ वाजता उठून अनेकदा साडी नेसून त्या धावण्याचा सराव करायच्या. होमगार्डमध्ये नोकरी मिळवून आपल्या मुलांना अधिक स्थिर भविष्य देणे हे त्यांचे ध्येय असल्याचे त्यांनी सांगितले.
View this post on Instagram
रामगढमध्ये २८४ पदांसाठी होमगार्ड भरती मोहीम राबवली जाणार आहे. शारीरिक क्षमता आणि लेखी परीक्षा २४ ऑक्टोबर ते ५ नोव्हेंबर दरम्यान होणार आहेत. निम्मी पदे महिलांसाठी राखीव ठेवण्यात आली आहेत, तर विधवा आणि घटस्फोटित महिलांसाठी अतिरिक्त ५% आरक्षण देण्यात आले आहे. या व्हिडिओने सोशल मीडियावर लक्ष वेधले असून कविताचे कौतुक होत आहे. आपल्या मुलांसाठी आणि सासरच्या लोकांसाठी स्थिर उदरनिर्वाह मिळवण्यासाठी कविताने दाखवलेल्या जिद्दीचे नेटकऱ्यांकडून कौतुक होत आहे.