ओमान : ओमानच्या सागरी किनाऱ्याजवळ असलेल्या मोक्याच्या ‘होर्मुझच्या सामुद्रधुनी’त (Strait of Hormuz) प्रवास करणाऱ्या एका व्यापारी जहाजावर मंगळवारी अचानक हल्ला झाला. पनामाचा ध्वज असलेल्या ‘एमटी ऑन पीस’ (MT On Peace) या जहाजावर अज्ञातांनी क्षेपणास्त्रासारख्या वस्तूने (Projectile) मारा केला. या दुर्घटनेत जहाजावरील १२ कर्मचाऱ्यांना दुखापत झाली असून, यामध्ये ११ भारतीय नागरिकांचा समावेश आहे. भारतीय परराष्ट्र मंत्रालयाने (MEA) या घटनेबाबत अधिकृत माहिती दिली आहे.

तत्परतेने रेस्क्यू ऑपरेशन; जखमींवर उपचार सुरू

परराष्ट्र मंत्रालयाने दिलेल्या माहितीनुसार, या व्यापारी जहाजावर एकूण १९ कर्मचारी तैनात होते, ज्यापैकी १७ जण भारतीय वंशाचे आहेत. हल्ल्याची माहिती मिळताच ओमानचे सुरक्षा दल आणि तटरक्षक दलाने अत्यंत वेगाने शोध व बचाव मोहीम राबवली. जखमी झालेल्या सर्व खलाश्यांना जहाजावरून सुरक्षित बाहेर काढून तातडीने ओमानमधील ‘खासाब’ शहरात वैद्यकीय उपचारासाठी दाखल करण्यात आले आहे. या संकटसमयी दाखवलेल्या तत्परतेबद्दल आणि सहकार्याबद्दल भारत सरकारने ओमान प्रशासनाचे मनापासून आभार मानले आहेत.

भारताकडून तीव्र संताप आणि निषेध

https://www.prahaar.in/2026/10/06/premanand-maharaj-move-belvan-ashram-to-keli-kunj-after-deepak-lodhi-suicide-rasik-dulari-sharan/

आंतरराष्ट्रीय सागरी मार्गावर व्यापारी जहाजांवर होणाऱ्या अशा जीवघेण्या हल्ल्यांवर भारताने तीव्र शब्दांत नाराजी व्यक्त केली आहे. परराष्ट्र मंत्रालयाने स्पष्ट केले की, मध्यपूर्वेतील या सागरी क्षेत्रात व्यापारी जहाजांना लक्ष्य केले जाणे ही अत्यंत गंभीर आणि चिंतेची बाब आहे. निरपराध नाविक, व्यापारी जहाजे आणि नागरी सुविधांना लक्ष्य करण्याचे प्रकार तात्काळ थांबले पाहिजेत, असे आवाहन भारताने केले आहे. तसेच, या भागातील तणाव कमी करून आंतरराष्ट्रीय व्यापार आणि जहाजांची ये-जा लवकरात लवकर पूर्ववत व सुरक्षित करावी, अशी आग्रही मागणी भारताने आंतरराष्ट्रीय स्तरावर केली आहे.

महिन्याभरातील दुसरी मोठी दुर्घटना

सागरी क्षेत्रातील सुरक्षेचा प्रश्न किती गंभीर बनला आहे, हे दाखवणारी ही महिन्याभरातील दुसरी दुर्घटना आहे. याआधी २३ सप्टेंबर रोजी भारताच्या दिशेने येणाऱ्या ‘एमव्ही केप दाओ’ (MV Cape Dao) या व्यापारी जहाजावर ओमानच्या पूर्व किनाऱ्याजवळ टॉरपीडोद्वारे दोन भयानक हल्ले करण्यात आले होते. या दुर्घटनेत उत्तर प्रदेशातील देवरिया येथील रहिवासी असलेले सूरज यादव या भारतीय खलाशाचा दुर्दैवी मृत्यू झाला होता, तर उर्वरित १९ भारतीय सहकाऱ्यांना सुखरूप वाचवण्यात यश आले होते. भारतीय दूतावास सध्या ओमानी प्रशासनाच्या मदतीने त्या सर्व भारतीय कर्मचाऱ्यांना मायदेशी आणण्यासाठी सातत्याने प्रयत्न करत आहे.

ब्रिक्स परिषदेत पंतप्रधान मोदींचा महत्त्वाचा प्रस्ताव

व्यापारी जहाजांवरील वाढत्या हल्ल्यांच्या पार्श्वभूमीवर, नुकत्याच पार पडलेल्या ‘ब्रिक्स’ (BRICS) शिखर परिषदेत भारताचे पंतप्रधान नरेंद्र मोदी यांनी जागतिक स्तरावर एक महत्त्वाचा मुद्दा मांडला होता. जगभरातील व्यापार सुरळीत ठेवण्यात नाविक महत्त्वाची भूमिका बजावतात; त्यामुळे संकटाच्या काळात त्यांच्या सुरक्षेसाठी आणि तातडीच्या मदतीसाठी ‘सीफेरर्स इमर्जन्सी सपोर्ट नेटवर्क’ (Seafarers’ Emergency Support Network) स्थापन करण्याचा प्रस्ताव पंतप्रधान मोदींनी जागतिक नेत्यांसमोर ठेवला होता.