श्रीनगर : जम्मू-काश्मीरच्या बडगाम जिल्ह्यात सुरक्षा दलांनी केलेल्या दहशतवादविरोधी कारवाईत लश्कर-ए-तोयबा (LeT) चा प्रमुख दहशतवादी मोहम्मद आसिफ उर्फ हाशिम मूसा ठार झाला. अनेक दहशतवादी हल्ल्यांमध्ये कथित सहभाग असल्याने सुरक्षा यंत्रणांना त्याचा शोध होता. मंगळवारी युसमार्ग परिसरात झालेल्या चकमकीत ही कारवाई करण्यात आली.
https://www.prahaar.in/2026/09/30/fire-in-duronto-express-pantry-car-at-csmt-yard-train-timings-changed/
भारतीय लष्कराच्या चिनार कॉर्प्स, जम्मू-काश्मीर पोलीस आणि केंद्रीय राखीव पोलीस दलाने (CRPF) संयुक्तपणे ही कारवाई केली. ‘ऑपरेशन कोरग’ अंतर्गत सुरक्षा दलांकडून परिसरात शोधमोहीम सुरू होती. यावेळी संशयित दहशतवाद्यांच्या हालचाली जवानांच्या लक्षात आल्या.
सुरक्षा दलांनी संशयितांना थांबण्याचे आवाहन केले. मात्र, दहशतवाद्यांनी जवानांच्या दिशेने गोळीबार सुरू केल्याने चकमक सुरू झाली. सुरक्षा दलांनी केलेल्या प्रत्युत्तराच्या कारवाईत मोहम्मद आसिफ उर्फ हाशिम मूसा ठार झाला. चकमकीनंतर सुरक्षा दलांनी त्याचा मृतदेह आणि काही युद्धसामग्री जप्त केली.
चिनार कॉर्प्सने दिलेल्या माहितीनुसार, पलमैदान परिसरात पहाटेच्या वेळी करण्यात आलेल्या शोधमोहिमेदरम्यान मूसा याचा मृतदेह आढळून आला. युसमार्ग आणि दुधपत्री परिसरातील दुर्गम जंगलात सुरक्षा दलांकडून ही कारवाई करण्यात आली.
Based on specific intelligence input, a Joint Search Operation was launched by Indian Army, J&K Police and Srinagar Sector CRPF in general area Korag, Yousmarg.
Vigilant troops observed suspicious activity and upon being challenged, terrorists opened fire, prompting a fierce… pic.twitter.com/vt5cuHtJB1
— ANI (@ANI) September 29, 2026
मोहम्मद आसिफ उर्फ हाशिम मूसा हा गेल्या काही वर्षांपासून सुरक्षा यंत्रणांच्या रडारवर होता. पीर पंजाल पर्वतरांगांच्या परिसरात झालेल्या काही दहशतवादी हल्ल्यांमध्ये त्याचा कथित सहभाग असल्याचे अधिकाऱ्यांनी सांगितले आहे. या महिन्याच्या सुरुवातीला युसमार्गच्या टेकड्यांमध्ये सुरक्षा दलांनी केलेल्या कारवाईतून तो बचावला होता, अशी माहिती समोर आली होती.
सुरक्षा अधिकाऱ्यांच्या माहितीनुसार, मूसाचा संबंध असलेला दहशतवादी गट 2021 ते 2024 या कालावधीत पूंछ आणि जम्मू-काश्मीरमधील इतर भागांत झालेल्या काही हल्ल्यांशी जोडला गेला होता. या हल्ल्यांमध्ये सुरक्षा दलातील अनेक जवानांचा मृत्यू झाला होता.
दरम्यान, बडगाम परिसरात सुरक्षा दलांची शोधमोहीम अद्याप सुरू असून, परिसरात आणखी दहशतवादी लपले आहेत का, याचा तपास केला जात आहे.