भारतीय महिला कंपाऊंड तिरंदाजी संघाने आशियाई क्रीडा स्पर्धेत शानदार कामगिरी करत सुवर्णपदक पटकावले आहे. अंतिम सामन्यात भारतीय संघाने चीनचा पराभव करत देशाच्या पदकतालिकेत आणखी एका सुवर्णपदकाची भर घातली. चिखिता थानिप्रथी, प्रीतिका प्रदीप आणि ज्योती सुरेखा वेन्नम या त्रिकुटाने अचूक नेमबाजी करत अंतिम सामन्यात दमदार कामगिरी केली.
अंतिम सामन्याच्या सुरुवातीला चीनने 10 गुणांसह चांगली सुरुवात केली. मात्र त्यानंतर दोन 9 गुण मिळाल्याने त्यांच्यावर दबाव वाढला. भारताने याचा फायदा घेत सलग तीन 10 गुण मिळवत सामन्यात आपली पकड मजबूत केली. चीनने त्यानंतर तीन 10 गुण मिळवत जोरदार पुनरागमन करण्याचा प्रयत्न केला. मात्र भारतीय खेळाडूंनीही अचूक नेम साधत त्याला प्रत्युत्तर दिले.
भारतीय संघाने सलग तीन परिपूर्ण 10 गुण मिळवत विश्वविक्रमाची बरोबरी केली आणि सुवर्णपदकावर आपले नाव कोरले. अंतिम सामन्यातील या कामगिरीमुळे भारतीय खेळाडूंच्या अचूकतेचे आणि दबावाच्या परिस्थितीत दाखवलेल्या संयमाचे कौतुक होत आहे.
Nagoya, Japan | India’s women’s compound archery team won gold at the 20th Asian Games in Aichi-Nagoya 2026. Team led by Jyothi Surekha Vennam, Chikitha Taniparthi, and Prithika Pradeep. pic.twitter.com/rc1zvZn79c
— ANI (@ANI) September 30, 2026
तत्पूर्वी, उपांत्य फेरीत भारताचा सामना दक्षिण कोरियाशी झाला. हा सामना शेवटपर्यंत चुरशीचा राहिला. भारतीय खेळाडू चिखिता थानिप्रथी, प्रीतिका प्रदीप आणि ज्योती सुरेखा वेन्नम यांनी दबाव असतानाही उत्तम कामगिरी केली.
दक्षिण कोरियाने भारतीय संघाला कडवी झुंज दिली. मात्र चिखिताचे पुनरागमन, प्रीतिकाची अचूक नेमबाजी आणि अनुभवी ज्योती सुरेखा वेन्नमच्या अखेरच्या फटक्यांमुळे भारताने 234-233 असा रोमांचक विजय मिळवला आणि अंतिम फेरीत प्रवेश केला.
उपांत्य फेरीतील या विजयाचा आत्मविश्वास अंतिम सामन्यातही भारतीय संघाने कायम ठेवला. तिन्ही खेळाडूंच्या अचूक नेमबाजीच्या जोरावर भारताने चीनला मागे टाकत सुवर्णपदकावर कब्जा केला. या कामगिरीमुळे आशियाई क्रीडा स्पर्धेत भारतीय तिरंदाजीच्या यशात आणखी एका महत्त्वाच्या अध्यायाची भर पडली.
थ्रिलर मॅचमध्ये भारताचा विजय! मिक्स्ड कंपाऊंड तीरंदाजीत दक्षिण कोरियाला नमवलं
भारताने आर्चरीमधील मिक्स्ड कंपाऊंड टीम इव्हेंटच्या अंतिम सामन्यात दक्षिण कोरियाचा रोमहर्षक शूट-ऑफमध्ये पराभव करत एशियन गेम्स 2026 मध्ये आपले आठवे सुवर्णपदक जिंकले. दोन्ही संघांचा स्कोअर 157-157 असा बरोबरीत होता, ज्यामुळे सामन्याचा निर्णय शूट-ऑफद्वारे घेण्यात आला. भारतीय जोडीने अप्रतिम संयम दाखवत शूट-ऑफ 10-9 अशा फरकाने आपल्या नावावर केला आणि अंतिम सामना 158-157 अशा एकूण स्कोअरने जिंकून सुवर्णपदक नावावर केले. भारताच्या साहिल राजेश जाधव आणि चिकिता तनिपर्थी या जोडीने अचूक वेध घेत देशाला हा बहुमान मिळवून दिला.