सोमवारी मिरज येथील शासकीय रुग्णालय परिसरात एक अत्यंत भीषण दुर्घटना घडली. रुग्णालयाच्या मुख्य प्रवेशद्वारावर एका नवीन कमानीचे काम सुरू असताना अचानक त्याचा स्लॅब कोसळला. या दुर्दैवी घटनेत तेथे काम करणारे सात मजूर ढिगाऱ्याखाली दाबले जाऊन जखमी झाले आहेत, ज्यातील काहींची प्रकृती चिंताजनक असल्याचे समजते.

https://www.prahaar.in/2026/09/21/cm-devendra-fadnavis-country-specific-skill-passports-will-be-created-to-supply-skilled-manpower-to-the-world-chief-minister-devendra-fadnavis/

बांधकाम चालू असतानाच अचानक स्लॅब खाली आल्यामुळे परिसरात एकच खळबळ उडाली आणि भीतीचे वातावरण निर्माण झाले. दुर्घटनेची माहिती मिळताच रुग्णालय प्रशासन आणि स्थानिक यंत्रणांनी तातडीने घटनास्थळी धाव घेतली. प्रशासनाने तात्काळ बचावकार्य सुरू करत ढिगाऱ्याखाली अडकलेल्या सर्व मजुरांना बाहेर काढले आणि त्यांना उपचारासाठी तत्काळ शासकीय रुग्णालयात दाखल केले. सध्या या मजुरांवर वैद्यकीय उपचार सुरू आहेत. या दुर्घटनेमुळे शासकीय रुग्णालयातील सुरक्षेचा आणि बांधकामाच्या दर्जाचा प्रश्न ऐरणीवर आला आहे. रुग्ण, त्यांचे नातेवाईक आणि नागरिकांची मोठी वर्दळ असलेल्या प्रवेशद्वारावर ही घटना घडल्याने नागरिकांच्या सुरक्षिततेबद्दल तीव्र चिंता व्यक्त केली जात आहे. अशा गजबजलेल्या ठिकाणी काम करताना पुरेशी खबरदारी का घेण्यात आली नाही, असा सवाल आता उपस्थित केला जात आहे.

स्लॅब कोसळण्याचे नेमके कारण अद्याप अस्पष्ट असून बांधकामातील तांत्रिक त्रुटी, निकृष्ट दर्जाचे साहित्य किंवा सुरक्षेच्या नियमांचे उल्लंघन यांपैकी काय घडले, याचा तपास आता संबंधित यंत्रणांकडून केला जात आहे. घटनेची सखोल चौकशी झाल्यानंतरच या दुर्घटनेमागील खरी कारणे आणि जबाबदार घटक समोर येतील. सध्या प्रशासनाकडून जखमी मजुरांवर योग्य उपचार करणे आणि घटनेच्या तपासावर भर दिला जात आहे.