मुंबई : ठाकरे गटाचे आमदार सुनील प्रभू (Sunil Prabhu) यांच्या कारचा पादचाऱ्याला धडक लागून अपघात झाल्याची घटना मुंबईतील विलेपार्ले परिसरात घडली आहे. या अपघातात सुनील धुलविया नावाचा पादचारी किरकोळ जखमी झाला आहे. ही घटना विलेपार्ले पोलीस ठाण्याच्या हद्दीत घडल्याची माहिती आहे.

मिळालेल्या माहितीनुसार, सुनील प्रभू हे कारमध्ये उपस्थित होते आणि त्यांचा चालक वाहन चालवत होता. मुंबई विमानतळाकडून कांदिवलीच्या दिशेने कार जात असताना पादचारी सुनील धुलविया यांना वाहनाचा धक्का लागला. या घटनेत ते किरकोळ जखमी झाले.

जखमीला उपचारासाठी रुग्णालयात दाखल 

अपघातानंतर सुनील प्रभू यांनी पोलिसांच्या 100 क्रमांकावर फोन करून घटनेची माहिती दिल्याची माहिती समोर येत आहे. तसेच जखमी व्यक्तीला तातडीने रुग्णालयात नेण्यास सांगण्यात आल्याचेही सांगितले जात आहे.

पोलीस तपास सुरु 

पोलिसांकडून घटनेची माहिती घेतली जात असून जखमी पादचाऱ्याचा जबाब नोंदवला जाणार आहे. त्यानंतर या प्रकरणात गुन्हा दाखल करण्याबाबत पुढील निर्णय घेतला जाण्याची माहिती आहे. अपघात नेमका कसा झाला, वाहनाचा वेग किती होता आणि यामध्ये चालकाची काय भूमिका होती, याचा तपास पोलिसांकडून केला जाण्याची शक्यता आहे.

या घटनेबाबत अधिकृत पोलीस नोंद किंवा गुन्हा दाखल झाल्यानंतर प्रकरणातील पुढील तपशील स्पष्ट होणार आहेत.