नागपुर :  नागपुरात मुलाच्या मृत्यूला आपली सूनच जबाबदार असल्याच्या संशयातून एका 70 वर्षीय सासऱ्याने सुनेची हत्या केल्याची धक्कादायक घटना समोर आली आहे. यशोधरानगर पोलीस ठाण्याच्या हद्दीतील पिवळी नदी परिसरातील पाहुणे ले-आउट येथे हा प्रकार घडला. लक्ष्मी रविशंकर पाली (45) असे मृत महिलेचे नाव असून नत्थूलाल पाली असे आरोपी सासऱ्याचे नाव आहे. सुनेवर हल्ला केल्यानंतर आरोपीने जवळच्या विहिरीत उडी घेऊन आत्महत्येचा प्रयत्न केला.

https://www.prahaar.in/2026/09/13/even-though-sound-is-a-part-of-the-festivities-restraint-is-the-true-culture/

पोलिसांच्या प्राथमिक माहितीनुसार, नत्थूलाल यांच्या मुलाचा 2019 मध्ये मृत्यू झाला होता. त्यानंतर आपल्या सुनेने जादूटोणा केल्यामुळेच मुलाचा मृत्यू झाला, असा संशय त्यांच्या मनात निर्माण झाला होता. याच कारणावरून सासरा आणि सून यांच्यात वारंवार वाद होत असल्याचे समोर आले आहे. आरोपीकडून लक्ष्मी यांना जीवे मारण्याच्या धमक्याही दिल्या जात असल्याची माहिती तपासात पुढे आली आहे.

शनिवारी दुपारी सुमारे 12:15 वाजता लक्ष्मी यांच्या घरातील मुलगी कामावर गेली होती, तर मुलगा घराबाहेर होता. यावेळी लक्ष्मी घराच्या मागील बाजूस कपडे धुत होत्या. त्याचवेळी नत्थूलाल यांनी मागून येत त्यांच्यावर कुऱ्हाडीने हल्ला केला. या हल्ल्यात लक्ष्मी गंभीर जखमी झाल्या आणि त्यांचा घटनास्थळीच मृत्यू झाला.

सासऱ्याची विहिरीत उडी, घटनेने पोलीसही चक्रावले

घटनेनंतर नत्थूलाल यांनी घरापासून सुमारे 100 मीटर अंतरावर असलेल्या विहिरीत उडी मारली. घटनेची माहिती मिळताच स्थानिक नागरिक आणि यशोधरानगर पोलिसांनी घटनास्थळी धाव घेतली. नागरिकांच्या मदतीने पोलिसांनी आरोपीला विहिरीतून बाहेर काढले. फुफ्फुसात पाणी गेल्याने त्याची प्रकृती चिंताजनक असून शासकीय वैद्यकीय महाविद्यालयात त्याच्यावर उपचार सुरू आहेत.

दरम्यान, फॉरेन्सिक पथकाने घटनास्थळाची पाहणी करून आवश्यक पुरावे जमा केले आहेत. यशोधरानगर पोलिसांनी नत्थूलाल पाली याच्याविरोधात हत्येचा गुन्हा दाखल केला असून पुढील तपास सुरू आहे.