मुंबई: अष्टपैलू अभिनेत्री सयानी गुप्ता हिच्यासाठी हे वर्ष अत्यंत यशस्वी ठरत असून, भारतीय चित्रपटसृष्टीसोबतच आता तिने आंतरराष्ट्रीय पातळीवरही आपले वर्चस्व प्रस्थापित केले आहे. तिचा दिग्दर्शकीय पदार्पणाचा लघुपट ‘आस्मानी’ हा जागतिक स्तरावर कौतुक मिळवत असतानाच, आता तिच्या ‘आर्या’ या आगामी अमेरिकन फीचर फिल्ममध्ये दोन प्रसिद्ध हॉलीवूड कलाकारांची निवड झाली आहे.(Aarya American Film)

दिग्दर्शक आणि तगडी स्टार कास्ट:

नील तुली यांच्या लेखणीतून साकारलेल्या आणि त्यांच्याच दिग्दर्शनाखाली बनणाऱ्या ‘आर्या’ या चित्रपटात, लोकप्रिय मालिका ‘रिव्हरडेल’ आणि ‘१३ रीझन्स व्हाय’ फेम अभिनेता रॉस बटलर तसेच ‘ब्रुकलिन नाइन-नाइन’ फेम मार्क इव्हान जॅक्सन हे सयानीसोबत महत्त्वाच्या भूमिकांमध्ये पाहायला मिळणार आहेत. या दोन आंतरराष्ट्रीय कलाकारांव्यतिरिक्त चित्रपटात अर्जुन गुप्ता, आदी रॉय, कायरा लेरॉक्स आणि इक्बाल थेबा हे नामांकित कलाकारही झळकणार आहेत.(Sayani Gupta)

https://www.prahaar.in/2026/09/12/bappa-immersed-before-installation-%e2%82%b947000-12-foot-ganesh-idol-snapped-in-two-en-route-activists-accuse-the-sculptor/

चित्रपटाची कथा आणि सयानीची भूमिका:

‘आर्या’ या चित्रपटात सयानी गुप्ता मुख्य भूमिकेत असून, ती एका प्रतिष्ठित भारतीय संगीत संस्थेतील शिस्तप्रिय पियानो शिक्षिकेची भूमिका साकारत आहे. अनपेक्षितपणे उत्तर मिनेसोटामध्ये एका कामासाठी गेलेल्या आर्यासमोर तिथे एका अडचणीत सापडलेल्या बँड प्रोग्रामला सावरणे आणि मायदेशी आपल्या करिअरच्या महत्त्वाकांक्षांना बळ देणे, असे दुहेरी आव्हान असते. मात्र, तिथल्या परिस्थितीमुळे काही गोंधळ निर्माण होतो आणि तिला स्वतःच्या वैयक्तिक असुरक्षिततेचा सामना करावा लागतो. विशेष म्हणजे, या चित्रपटात मुख्य भूमिका साकारण्यासोबतच सयानी गुप्ता रॉस बटलर यांच्यासह ‘एक्झिक्युटिव्ह प्रोड्युसर’ (कार्यकारी निर्माती) म्हणूनही जबाबदारी सांभाळत आहे.(Ross Butler)

दुकडी यश आणि नव्या प्रवासाची सुरुवात:

सयानीच्या कारकिर्दीसाठी हा काळ अत्यंत सुवर्णकाळ मानला जात आहे. एका बाजूला तिचा स्वतः लेखन आणि निर्मिती असलेला दिग्दर्शकीय लघुपट ‘आस्मानी’ वॉशिंग्टन डीसीपासून टोकियो आणि केरळपर्यंतच्या महोत्सवांमध्ये आपला ठसा उमटवत आहे, तर दुसरीकडे ती पहिल्यांदाच एखाद्या अमेरिकन ‘इंडी’ (स्वतंत्र निर्मिती) फीचर फिल्ममध्ये मुख्य नायिका म्हणून समोर येत आहे. भारतीय ओटीटीवर आपल्या कसदार अभिनयाने एक दशकाहून अधिक काळ प्रेक्षकांची मने जिंकणारी सयानी, आता दिग्दर्शन आणि आंतरराष्ट्रीय अभिनय अशा दोन्ही आघाड्यांवर यशस्वी घोडदौड करत आहे.(Mark Evan Jackson)