मुंबई: लाडक्या गणरायाच्या आगमनासाठी प्रत्येकजण उत्सुक आहोत. गणेशोत्सवाच्या दिवसांमध्ये मुंबईत मोठ्या प्रमाणावर गणेशभक्त रात्री सुद्धा गणरायाचे दर्शन घेण्यासाठी घराबाहेर पडत असतात. यासर्व गणेशभक्तांसाठी महामुंबई मेट्रोकडून विशेष सुविधा देण्यात येणार आहे. गणेशभक्तांना गणेशोत्सवाचा पुरेपूर आनंद घेता यावा, सुरक्षित आणि विश्वासार्ह प्रवास सुविधा मिळावी, यासाठी एमएमआरडीएद्वारे गणेशोत्सवात मार्गिका २अ, ७, ९ आणि २ब वर रात्री १२.३० वा. पर्यंत विशेष अतिरिक्त सेवा देण्याचा निर्णय घेतला आहे.
https://www.prahaar.in/2026/09/12/traffic-changes-in-pune-for-ganeshotsav-a-key-decision-to-prevent-traffic-congestion-caused-by-idol-shopping/
खरंतर, मेट्रो मार्गिका २अ, ७, ९ आणि २ब वरून शेवटची लोकल रात्री ११ वाजता सुटते. पण आता गणेशोत्सवाच्या दिवसांमध्ये शेवटची मेट्रो मध्यरात्री १२.३० वाजता सुटणार आहे. तब्बल दीड तासांसाठी मेट्रोसेवा वाढवण्यात आली आहे. प्रवाशांची संभाव्य गर्दी लक्षात घेऊन गर्दीच्या वेळेमध्ये नियमित सेवांव्यतिरिक्त १० ते १५ अतिरिक्त फेऱ्यांचे नियोजन करण्यात आले आहे. अंधेरी पश्चिम आणि दहिसर पूर्व (मार्गिका २अ), गुंदवली आणि काशीगाव (मार्गिका ७ व ९) तसेच महाराष्ट्र नगर-मंडाळे आणि चेंबूर (मार्गिका २ब) येथून शेवटची मेट्रो रात्री ११.०० वा. ऐवजी मध्यरात्री १२.३० वा. सुटणार आहे. त्यामुळे शेवटची मेट्रो सुटण्याची चिंता न करता गणेशभक्तांना रात्री उशिरापर्यंत गणेशोत्सवाचा आनंद घेता येणार आहे.
कोणत्या मार्गिकेवर किती अतिरिक्त फेऱ्या?
- सोमवार ते शुक्रवार: मार्गिका २अ- २९९ फेऱ्या (+१०) | मार्गिका ७ आणि ९- २९० फेऱ्या (+१४)| मार्गिका २ब- १८० फेऱ्या (+१५)
- शनिवार: मार्गिका २अ- २४१ फेऱ्या (+१०)| मार्गिका ७ आणि ९- २३७ फेऱ्या (+१४)| मार्गिका २ब- १८० फेऱ्या (+१५)
- रविवार: मार्गिका २अ- २२३ फेऱ्या (+१०)| मार्गिका ७ आणि ९- २१९ फेऱ्या (+१४)| मार्गिका २ब- १८० फेऱ्या (+१५)
https://www.prahaar.in/2026/09/12/a-second-modi-express-will-depart-tomorrow-facilitated-by-minister-nitesh-rane/
विशेष अतिरिक्त सुविधा आणि गणेशोत्सवाच्या दिवसांमध्ये करण्यात आलेल्या वाढीव फेऱ्यांमुळे, प्रवाशांना आपल्या आवडत्या गणेश मंडळापर्यंत आणि गणेशोत्सवाच्या स्थळी सुरक्षित, सुरळीत व विश्वासार्ह रात्रीच्या प्रवासाची सुविधा मिळणार आहे. दरवर्षी प्रमाणे यावर्षी सुद्धा महा मुंबई मेट्रोकडून गणेशभक्तांना मेट्रोच्या अतिरिक्त फेऱ्यांचं गिफ्ट मिळालं आहे. गणेशोत्सवाच्या दिवसांमध्ये मुंबईच्या रस्त्यांवर मोठ्या प्रमाणावर वाहतूक कोंडीची समस्या निर्माण होते. त्यामुळे महानगर पालिका प्रशासनाकडून आणि महा मुंबई मेट्रोकडून प्रवाशांना खासगी वाहतुकीचा वापर न करता सार्वजनिक वाहतुकीचा वापर करत गणेशोत्सव साजरा करण्याचे आवाहन केले आहे.