बृहन्मुंबई महानगरपालिकेच्या ‘एफ दक्षिण’ विभागाकडून कारवाई

Mumbai : पदपथ अडथळामुक्त करुन पादचाऱ्यांसाठी सुलभ करण्यासाठी मुंबई महानगरपालिकेकडून ‘पादचारी प्रथम’ अभियान राबविण्यात येत आहे. या अंतर्गत, ‘एफ दक्षिण’ विभागाकडून लालबाग परिसरातील विविध मानाचे गणपती आणि आसपासच्या परिसरातील पदपथांवर अडथळा निर्माण करणाऱ्या ०६ अनधिकृत दुकानांसह ४३ अनधिकृत फेरीवाल्यांचे बुधवारी १९ ऑगस्ट २०२६ रोजी कारवाई करण्यात आली. उच्च न्यायालयाच्या निर्देशांनुसार, महानगरपालिका आयुक्त आश्विनी भिडे यांच्या मार्गदर्शनात, अतिरिक्त महानगरपालिका आयुक्त (शहर) प्राजक्ता लवंगारे यांच्या नेतृत्वात पदपथांवरील अनधिकृत फेरीवाले व अतिक्रमणे तत्काळ हटवून पदपथ अडथळामुक्त करण्यासाठी महानगरपालिकेकडून ‘पादचारी प्रथम’ अभियान राबविण्यात येत आहे.

https://prahaar.in/2026/08/19/woman-arrested-at-mumbai-airport-for-%e2%82%b91-13-crore-fraud-under-the-pretext-of-mbbs-admission/

उपायुक्त (परिमंडळ-२) प्रशांत सपकाळे यांच्या मार्गदर्शनात, सहायक आयुक्त (एफ दक्षिण विभाग) वृषाली इंगुले यांच्या नेतृत्वात ‘एफ दक्षिण’ विभागाकडून लालबाग परिसरात कारवाई करण्यात आली. या कारवाईत लालबाग परिसरातील मानाचे गणपती व आसपासचा परिसर तसेच डॉ. बाबासाहेब आंबेडकर मार्गालगतच्या पदपथांवर अडथळा निर्माण करणारी ०६ अनधिकृत दुकाने, २४ तात्पुरते ताडपत्रीचे शेड, ०३ अनधिकृत कट्टे आणि ४३ फेरीवाल्यांवर बुधवारी कारवाई करण्यात आली. तसेच, या परिसरात स्वच्छताही करण्यात आली. यावेळी काळाचौकी पोलिसांचा बंदोबस्त तैनात होता. दरम्यान, पादचाऱ्यांना मार्गक्रमण करण्यासाठी पदपथ सुलभ आणि सुरक्षित राहावेत. पदपथांवर अनधिकृत बांधकामे निर्माण करुन अथवा साहित्य ठेवून अडथळा निर्माण करू नयेत. अन्यथा, कठोर कारवाई करण्यात येईल, असे महानगरपालिका प्रशासनाकडून कळविण्यात येत आहे.