मुंबई : मुंबईतील महापालिका रुग्णालयांमध्ये निवासी डॉक्टरांच्या संपामुळे हजारो रुग्णांना मोठा मनस्ताप सहन करावा लागत आहे. बृहन्मुंबई महानगरपालिका महाराष्ट्र असोसिएशन ऑफ रेसिडेंट डॉक्टर्स (BMC MARD) यांनी आजपासून केईएम, लोकमान्य टिळक (सायन), नायर आणि कूपर रुग्णालयांमधील नियमित बाह्यरुग्ण विभाग (OPD) सेवा स्थगित करण्याचा निर्णय घेतला आहे. त्यामुळे उपचारासाठी आलेल्या अनेक रुग्णांना तपासणी न होताच परतावे लागले, तर काहींना खासगी रुग्णालयांचा पर्याय स्वीकारावा लागला.

महाराष्ट्र मेडिकल कौन्सिल (MMC) मार्फत CCMP पात्रता प्राप्त BHMS वैद्यकीय व्यावसायिकांना नोंदणी देण्याची प्रक्रिया सुरू केल्याच्या निषेधार्थ डॉक्टरांनी हे आंदोलन पुकारले आहे. BMC MARD च्या मते, ही प्रक्रिया रुग्ण सुरक्षेला धोका निर्माण करणारी असून वैद्यकीय शिक्षणाच्या दर्जावर परिणाम करणारी आहे.

https://prahaar.in/2026/08/05/demand-for-smart-artificial-turf-policy-in-mumbai-corporator-suggests-move-to-boost-municipal-corporations-revenue/

संघटनेने CCMP पात्रता प्राप्त BHMS डॉक्टरांच्या MMC नोंदणीची प्रक्रिया तात्काळ स्थगित करावी, उच्च न्यायालयाचा अंतिम निर्णय येईपर्यंत कोणतीही पुढील कार्यवाही करू नये आणि निवासी डॉक्टरांच्या प्रलंबित मागण्यांवर शासनाने तातडीने चर्चा करावी, अशा प्रमुख मागण्या केल्या आहेत.

दरम्यान, संपामुळे नियमित ओपीडी सेवा बंद असली तरी आपत्कालीन विभाग, कॅज्युअल्टी, अतिदक्षता विभाग (ICU), प्रसूती सेवा आणि आंतररुग्ण (IPD) सेवा पूर्ववत सुरू असल्याचे BMC MARD ने स्पष्ट केले आहे. (Mumbai Doctor)

संघटनेने इशारा दिला आहे की, पुढील २४ तासांत शासनाने नोंदणी प्रक्रिया स्थगित केली नाही, तर आंदोलन अधिक तीव्र करण्यात येईल. त्यामुळे येत्या काही दिवसांत रुग्णांच्या अडचणी आणखी वाढण्याची शक्यता व्यक्त केली जात आहे.