Commonwealth Games 2026 : राष्ट्रकुल क्रीडा स्पर्धा 2026 मध्ये भारताच्या भालाफेकपटूंनी शानदार कामगिरी करत पुरुषांच्या भालाफेक प्रकारात दोन पदके जिंकली. शुक्रवारी रात्री उशिरा झालेल्या अंतिम फेरीत नीरज चोप्राने रौप्यपदक, तर यशवीर सिंगने कांस्यपदक आपल्या नावावर केले. श्रीलंकेच्या रुमेश थरंगा पाथिराजाने सर्वाधिक 89.75 मीटर भालाफेक करत सुवर्णपदक पटकावले. (Neeraj Chopra)

https://prahaar.in/2026/07/31/indian-hockey-team-indian-strikers-reveal-the-formula-for-success-ahead-of-the-hockey-world-cup/

ऑलिम्पिक पदक विजेता नीरज चोप्राने स्पर्धेची सुरुवात 80.97 मीटर फेकीने केली. त्यानंतर दुसऱ्या प्रयत्नात त्याने 85.83 मीटर अंतर गाठत हंगामातील सर्वोत्तम कामगिरी नोंदवली. पुढील प्रयत्नांमध्ये त्याने 81.29 मीटर आणि 80.73 मीटर अशी फेक केली. मात्र, श्रीलंकेच्या रुमेश पाथिराजाच्या दमदार कामगिरीमुळे नीरजला रौप्यपदकावर समाधान मानावे लागले. (Yashvir Singh)

यशवीर सिंगनेही स्पर्धेत लक्षवेधी कामगिरी केली. सुरुवातीच्या प्रयत्नांनंतर त्याने सातत्याने आपली कामगिरी उंचावली. अखेरच्या प्रयत्नात त्याने 85.41 मीटर अंतर गाठत कांस्यपदक जिंकले. विशेष म्हणजे ही त्याच्या कारकिर्दीतील वैयक्तिक सर्वोत्तम कामगिरी ठरली. (CommanWealth Games)

भारताचा आणखी एक खेळाडू रोहित यादवने 81.56 मीटर अंतर गाठत स्पर्धेत सातवे स्थान मिळवले. त्यानेही काही चांगल्या फेकी करत अंतिम क्रमवारीत स्थान मिळवले.

या यशानंतर भारताची 2026 राष्ट्रकुल क्रीडा स्पर्धेतील पदकसंख्या 23 वर पोहोचली आहे. भारताने आतापर्यंत 5 सुवर्ण, 12 रौप्य आणि 6 कांस्य पदके जिंकली आहेत. ॲथलेटिक्स आणि पॅरा-ॲथलेटिक्समध्ये मिळून 11 पदके मिळाली असून, ज्युडोमध्ये 3, वेटलिफ्टिंगमध्ये 8 आणि पॅरा-पॉवरलिफ्टिंगमध्ये 1 कांस्यपदक भारताने जिंकले आहे. (Javelin Throw)

सध्या पदकतालिकेत भारत 10 व्या स्थानावर आहे. ऑस्ट्रेलिया 128 पदकांसह अव्वल स्थानावर असून इंग्लंड दुसऱ्या आणि कॅनडा तिसऱ्या क्रमांकावर आहे.