नवी दिल्लीत रात्री उशिरा खलबते; १७ जुलैला केंद्रीय मंत्रिमंडळ विस्ताराची शक्यता, श्रीकांत शिंदेंना कॅबिनेट मंत्रिपदाची चर्चा
मुंबई : राज्याच्या आणि केंद्राच्या राजकारणात आगामी काळात अत्यंत महत्त्वाच्या आणि मोठ्या घडामोडी घडण्याचे संकेत मिळत असून, उपमुख्यमंत्री एकनाथ शिंदे यांच्यासह शिवसेनेच्या सहा फुटीर खासदारांनी मंगळवारी रात्री उशिरा नवी दिल्लीत केंद्रीय गृहमंत्री अमित शहा यांची त्यांच्या निवासस्थानी भेट घेतली. येत्या १७ जुलै रोजी नरेंद्र मोदी सरकारच्या केंद्रीय मंत्रिमंडळाचा विस्तार होण्याची दाट शक्यता असून, या पार्श्वभूमीवर झालेली ही बैठक राजकीयदृष्ट्या अत्यंत महत्त्वाची मानली जात आहे. या विस्तारात शिवसेनेच्या वाटेला एक कॅबिनेट आणि एक राज्यमंत्रिपद मिळण्याची शक्यता आहे. खासदार श्रीकांत शिंदे यांची केंद्रीय कॅबिनेट मंत्रिपदी वर्णी लागण्याची जोरदार चर्चा या निमित्ताने राजकीय वर्तुळात सुरू झाली आहे.
https://prahaar.in/2026/07/14/possibility-of-a-new-coronavirus-variant-emerging-in-andhra-pradesh-two-deaths-spark-alarm/
केंद्रीय मंत्रिमंडळ विस्ताराच्या पार्श्वभूमीवर मंगळवारी दुपारपासून शिवसेनेच्या गोटातील राजकीय हालचाली कमालीच्या वाढल्या. खासदार श्रीकांत शिंदे यांच्यासह उबाठा गटातून शिंदे गटात प्रवेश केलेले सर्व सहा खासदार मंगळवारी संध्याकाळी ४ वाजताच्या सुमारास विशेष चार्टर्ड विमानाने मुंबईहून तातडीने दिल्लीसाठी रवाना झाले. त्यानंतर रात्री उशिरा उपमुख्यमंत्री एकनाथ शिंदे यांच्या नेतृत्वाखाली या सर्व खासदारांनी अमित शहा यांच्या निवासस्थानी जाऊन त्यांची भेट घेतली. या बैठकीत केंद्रातील सत्तासहभाग आणि महाराष्ट्रातील आगामी राजकीय समीकरणांवर सखोल चर्चा झाल्याची माहिती खात्रीलायक सूत्रांनी दिली आहे.
https://prahaar.in/2026/07/14/bhojshala-in-dhar-is-indeed-the-vagdevi-temple-supreme-court-refuses-to-stay-high-courts-decision/
सूत्रांनी दिलेल्या माहितीनुसार, १७ जुलै रोजी होणाऱ्या संभाव्य मंत्रिमंडळ विस्तारात शिवसेनेला केंद्रात एक कॅबिनेट आणि एक राज्यमंत्रिपद दिले जाऊ शकते. कॅबिनेट मंत्रिपदासाठी खासदार श्रीकांत शिंदे यांचे नाव आघाडीवर असल्याचे बोलले जात आहे. मात्र, दुसरीकडे ठाकरे गटातून शिंदे गटात आलेल्या सहाही खासदारांना केंद्रीय मंत्रिपदाची मोठी अपेक्षा असून, त्यांच्यामध्ये सध्या जोरदार रस्सीखेच सुरू आहे. विशेषतः राज्यमंत्रिपदासाठी खासदार ओमराजे निंबाळकर आणि खासदार संजय जाधव यांच्यात मोठी स्पर्धा असल्याचे समजते. या पार्श्वभूमीवर अमित शहा यांच्यासोबत झालेल्या बैठकीत एकनाथ शिंदे यांनी कोणाच्या नावावर शिक्कामोर्तब केले, याकडे सर्वांचे लक्ष लागले आहे.