सध्या इंटरनेटवर ‘रिपब्लिक ऑफ बलुचिस्तान’ (Republic of Balochistan) या नावाने एक अधिकृत पत्र आणि निवेदन प्रचंड व्हायरल होत आहे. या पत्रात असा खळबळजनक दावा करण्यात आला आहे की, बलुचिस्तानच्या बंडखोर लष्कराने (Baloch Rebels) प्रांताच्या तब्बल ८५ टक्के भूभागावर आपले निर्विवाद वर्चस्व प्रस्थापित केले आहे. पाकिस्तानच्या हाताळणीतून हा भाग पूर्णपणे निसटल्याचे यातून सुचवण्यात आले असून, यामुळे आंतरराष्ट्रीय स्तरावर आणि पाकिस्तानच्या सत्ताधाऱ्यांमध्ये मोठी खळबळ उडाली आहे.

व्हायरल पत्रातील प्रमुख आणि धक्कादायक खुलासे

या व्हायरल पत्रामध्ये केवळ स्वातंत्र्याची घोषणाच नाही, तर नव्या प्रशासकीय रचनेचे अनेक मोठे दावे करण्यात आले आहेत. बलुचिस्तानने आता स्वतःचा नवा राष्ट्रध्वज, स्वतःचे राष्ट्रगीत आणि वेगळे चलन (Currency) लागू केल्याचा दावा पत्रात आहे. तसेच, संपूर्ण प्रशासकीय यंत्रणा आता नव्या ‘बलूच सरकार’च्या हाती असल्याचं म्हटलं आहे. बलुचिस्तानमधील महत्त्वाचे गॅस प्रकल्प, मुबलक खनिज साठे आणि कोळशाच्या खाणी आता थेट नव्या प्रशासनाच्या नियंत्रणाखाली आल्या आहेत. पाकिस्तानच्या सैन्य आणि सुरक्षा दलात कार्यरत असलेल्या अनेक बलूच नागरिकांनी राजीनामे सत्र सुरू केले असून, ते आता बलुचिस्तानच्या स्वातंत्र्यलढ्यात उघडपणे सामील झाल्याचे या पत्रात नमूद करण्यात आले आहे.

https://prahaar.in/2026/07/14/ats-takes-action-against-suspects-linked-to-pakistani-gangster-bhatti-raids-conducted-in-pune-pimpri-chinchwad-and-rural-areas-with-45-individuals-detained/

लष्करशहा आणि पंतप्रधानांविरोधात उफाळलेला संताप

बलुचिस्तानमध्ये पाकिस्तानी लष्कराकडून होणारे मानवाधिकार उल्लंघन आणि होणारा अन्याय हा काही नवा मुद्दा नाही. गेल्या अनेक दशकांपासून तेथील जनता पाकिस्तान सरकारच्या विरोधात धुमसत आहे. बलूच नागरिकांनी वेळोवेळी रस्त्यावर उतरून पंतप्रधान शहबाज शरीफ (Shehbaz Sharif) आणि लष्करप्रमुख आसिम मुनीर (Asim Munir) यांच्या दडपशाहीला कडाडून विरोध दर्शवला आहे. आता या असंतोषाचे रूपांतर थेट स्वातंत्र्याच्या घोषणेत झाल्याचे या व्हायरल दाव्यातून दिसत आहे.

रक्तरंजित संघर्ष आणि ‘ऑपरेशन शाबान’

गेल्या काही महिन्यांपासून बलुचिस्तानमध्ये पाकिस्तानी सैन्य आणि बंडखोरांमध्ये उघड संघर्ष सुरू आहे. ‘तहरीक-ए-तालिबान पाकिस्तान’ (TTP) चे दहशतवादी आणि बलूच विद्रोही मिळून पाकिस्तानी लष्कराला लक्ष्य करत आहेत. बंडखोरांचा बिमोड करण्यासाठी पाकिस्तानी सुरक्षा दलांनी ५ जुलैपासून ‘ऑपरेशन शाबान’ (Operation Shaban) ही मोठी मोहीम हाती घेतली आहे. या कारवाईत फ्रंटियर कोर आणि पोलिसांनी मिळून आतापर्यंत १०९ हून अधिक बंडखोरांना कंठस्नान घातले आहे. एकीकडे हा भयंकर रक्तरंजित संघर्ष सुरू असतानाच, दुसरीकडे बलुचिस्तानच्या स्वातंत्र्याचे हे पत्र समोर आल्याने पाकिस्तानच्या अडचणीत मोठी भर पडली आहे.