मुंबई (विशेष प्रतिनिधी) : संपूर्ण पावसाळ्याच्या कालावधीत मुंबईकरांना सुदृढ आणि निरोगी आरोग्य सेवा देण्यासाठी महानगरपालिकेच्या सार्वजनिक आरोग्य यंत्रणेने सज्ज रहावे. तसेच पावसाळा कालावधीतील जलजन्य आजारांच्या अनुषंगाने आवश्यक उपाययोजना कराव्यात. तसेच आरोग्य यंत्रणेअंतर्गत पुरेसे मनुष्यबळ उपलब्ध करून द्यावे, असे निर्देश सार्वजनिक आरोग्य समितीचे अध्यक्ष हरीश भांदिर्गे यांनी दिले. पावसाळी आजार प्रतिबंध आणि नियंत्रण आढावा बैठकीच्या निमित्ताने त्यांनी सार्वजनिक आरोग्य यंत्रणेला आगामी पावसाळा कालावधीसाठी पूरक तयारी करण्याचे निर्देश दिले.

https://prahaar.in/2026/07/02/women-farmers-empowerment-bill-passed-unanimously-in-the-legislative-assembly/

पावसाळी आजारांच्या अनुषंगाने प्रतिबंधात्मक उपाययोजना कराव्यात. तसेच नागरिकांमध्ये जलजन्य आजारांबाबत पुरेशी जनजागृती करण्यासाठी विभागनिहाय पातळीवर पुढाकार घेण्यात यावा. महानगरपालिकेचे दवाखाने आणि रुग्णालयाच्या ठिकाणी पुरेसा औषधसाठा उपलब्ध करून देण्याचे निर्देशही त्यांनी बृहन्मुंबई महानगरपालिका प्रशासनाला दिले. काही प्रभागांमध्ये लक्ष केंद्रित करून त्याठिकाणी पावसाळी आजारांच्या अनुषंगाने रूग्णसंख्या कमी करण्यासाठी विशेष प्रयत्न करावेत, असेही भांदिर्गे म्हणाले. यावेळी सभागृह नेते गणेश खणकर, उपायुक्त (सार्वजनिक आरोग्य) शरद उघडे, संचालक (वैद्यकीय शिक्षण व प्रमुख रूग्णालये) शैलेश मोहिते, कार्यकारी आरोग्य अधिकारी डॉ. दक्षा शहा तसेच प्रमुख रूग्णालयाचे अधिष्ठाता आणि उपनगरीय रूग्णालयाचे वैद्यकीय अधिक्षक, तसेच वैद्यकीय आरोग्य अधिकारी उपस्थित होते.

https://prahaar.in/2026/07/02/police-presence-in-mumbai-local-train-ladies-compartments-now-from-9-pm-to-8-am/

जलजन्य आजारांच्या अनुषंगाने प्रतिबंधात्मक उपाययोजनांबाबत महानगरपालिकेमार्फत सादरीकरण करण्यात आले. यावेळी डास प्रतिबंधात्मक उपाययोजना, मूषक नियंत्रण, लेप्टोस्पायरेसिसच्या आजाराच्या निमित्ताने करण्यात येणाऱ्या उपाययोजनांची माहिती देण्यात आली. महानगरपालिकेच्या माध्यमातून जलजन्य आजारांच्या अनुषंगाने प्रमुख तसेच उपनगरीय रूग्णालयामध्ये उपलब्ध रुग्णशय्यांच्या अतिरिक्त उपलब्ध संख्येबाबतही माहिती यावेळी महानगरपालिका प्रशासनामार्फत देण्यात आली.

https://prahaar.in/2026/07/02/st-ncmc-card-overwhelming-response-from-passengers-to-sts-ncmc-smart-card-6-286-million-have-registered/

महिलांच्या आरोग्याच्या अनुषंगाने अत्यंत गरजेची मॅमोग्राफी चाचणी करण्यासाठी अधिकाधिक महिलांना माहिती देण्यात यावी. तसेच कर्करोग चाचणीच्या अनुषंगाने मॅमोग्राफी चाचणी ही अधिकाधिक रूग्णालयाच्या ठिकाणी उपलब्ध करून देण्यासाठी महानगरपालिकेच्या यंत्रणेने जनजागृती करण्याचे निर्देश हरीश भांदिर्गे यांनी यंत्रणेला दिले. येत्या कालावधीत अधिकाधिक महिलांना या चाचणीला लाभ मिळावा यादृष्टीने सार्वजनिक आरोग्य यंत्रणेच्या मनुष्यबळाने प्रयत्न करण्याची सूचनाही त्यांनी यावेळी केली.