मुंबई : राज्यातील बनावट इंजेक्शन पुरवठ्याच्या आंतरराज्यीय रॅकेटची पाळेमुळे खोदून काढण्यासाठी दोषींवर ‘मकोका’ (MCOCA) अंतर्गत कडक कारवाई करण्याची मागणी विधिमंडळात करण्यात आली. विधानपरिषदेच्या पावसाळी अधिवेशनातील प्रश्नोत्तराच्या तासात भाजप आमदार श्रीकांत भारतीय आणि डॉ. परिणय फुके यांनी नागपूरच्या ‘हितांशी फार्मास्युटिकल्स’वरील कारवाईचा दाखला देत हा गंभीर मुद्दा उपस्थित केला. रिलायन्स लाईफ सायन्सेसचे ‘अल्बुरेल’ (Alburel) हे इंजेक्शन बनावट असल्याचे सिद्ध झाले असून, याचे कनेक्शन मुंबई, हैदराबाद, तेलंगणा, नवी मुंबई, दिल्ली आणि चंदीगड अशा विविध राज्यांमध्ये पसरले असल्याचे आमदारांनी सभागृहात उघड केले. हा लोकांच्या जिवाशी खेळणारा संघटित गुन्हा असल्याने या संपूर्ण टोळीवर ‘मकोका’ लावण्याची आणि ‘ड्रग्स अँड कॉस्मॅटिक्स ऍक्ट १९४०’ च्या कलम २७ अंतर्गत कठोर कारवाई करण्याची आग्रही मागणी आमदारांनी लावून धरली.

https://prahaar.in/2026/06/30/ashok-kharat/

सभागृहाच्या या संतप्त भावनांवर आणि आमदारांनी उपस्थित केलेल्या गंभीर प्रश्नांवर सकारात्मक समन्वय साधत मंत्री नरहरी झिरवाळ यांनी सरकारची भूमिका स्पष्ट केली. मंत्री झिरवाळ यांनी उत्तर देताना सांगितले की, “हे एक मोठे आंतरराज्यीय रॅकेट असून, यापूर्वी ज्याप्रमाणे दुधातील भेसळ किंवा गुटखा रॅकेटच्या गुन्हेगारी साखळीवर कडक कारवाई करण्यात आली होती, त्याच धर्तीवर या बनावट औषध रॅकेटवरही सरकार पूर्ण ताकदीने कारवाई करत आहे.” या प्रकरणातील गुन्हेगारी साखळी मोडून काढण्यासाठी ‘मकोका’ अंतर्गत कठोर कारवाई करण्याच्या दृष्टीने विधी व न्याय विभाग (Law and Judiciary Department) आणि गृह विभागाकडून आवश्यक ती सर्व कायदेशीर माहिती व सल्ला घेण्याची प्रक्रिया गतिमान करण्यात आली आहे. प्रशासनाकडून विधी व न्याय विभागाचे आवश्यक ते मार्गदर्शन तातडीने घेऊन या साखळीतील मुख्य सूत्रधारांवर निश्चितपणे ‘मकोका’ लावून कडक कायदेशीर कारवाई केली जाईल, असे आश्वस्त करत त्यांनी जनसामान्यांच्या आरोग्याचे रक्षण करण्यासाठी सरकार कटिबद्ध असल्याचे स्पष्ट केले.