फिफा विश्वचषक २०२६ मध्ये सर्वात मोठा उलटफेर पाहायला मिळाला. चार वेळचा विश्वविजेता जर्मनीला पॅराग्वेने पेनल्टी शूटआऊटमध्ये ४-३ ने पराभूत करत स्पर्धेबाहेरचा रस्ता दाखवला. निर्धारित आणि अतिरिक्त वेळेत सामना १-१ असा बरोबरीत राहिल्यानंतर झालेल्या थरारक पेनल्टी शूटआऊटमध्ये पॅराग्वेने इतिहास रचला. विशेष म्हणजे, विश्वचषकाच्या इतिहासात जर्मनीची पेनल्टी शूटआऊटमधील ही पहिलीच पराभवाची नोंद ठरली. (FIFA World Cup 2026)

सामन्याच्या पहिल्या हाफमध्ये पॅराग्वेने आक्रमक खेळ करत जर्मनीवर दबाव निर्माण केला. ४५ व्या मिनिटाच्या सुमारास ज्युलिओ एन्सिसोने शानदार हेडरद्वारे गोल करत पॅराग्वेला १-० अशी आघाडी मिळवून दिली. कॉर्नरनंतर मॅटियास गालार्झाने दिलेल्या अचूक क्रॉसवर एन्सिसो पूर्णपणे अनमार्क राहिला आणि त्याने संधीचे सोनं केले. (FIFA World Cup 2026)

https://prahaar.in/2026/06/29/ioc-approves-cricket-qualification-criteria-for-la-olympics/

दुसऱ्या हाफमध्ये जर्मनीने पुनरागमन केले. ५४ व्या मिनिटाला फ्लोरियन विर्ट्झच्या अचूक क्रॉसवर काई हॅव्हर्ट्झने शानदार हेडर मारत बरोबरी साधली. स्पर्धेतील त्याचा हा तिसरा गोल ठरला. त्यानंतर जर्मनीने अनेक संधी निर्माण केल्या, मात्र पॅराग्वेचा गोलरक्षक ऑर्लांडो गिल भक्कमपणे उभा राहिला. अतिरिक्त वेळेत जोनाथन टाहने हेडरद्वारे गोल केला होता. मात्र व्हीएआर (VAR) तपासणीनंतर गोलरक्षकावर फाऊल झाल्याचे स्पष्ट झाल्याने हा गोल रद्द करण्यात आला. हा निर्णय जर्मनीसाठी मोठा धक्का ठरला. (FIFA World Cup 2026)

त्यानंतर सामना पेनल्टी शूटआऊटकडे गेला. पॅराग्वेचा गोलरक्षक ऑर्लांडो गिलने काई हॅव्हर्ट्झ आणि निक वोल्टेमाडे यांच्या पेनल्टी रोखत संघाला मोठी आघाडी मिळवून दिली. दुसरीकडे, जर्मनीचा जोनाथन टाह निर्णायक क्षणी पेनल्टी चुकला. त्यानंतर जोसे कॅनालेने अचूक पेनल्टी मारत पॅराग्वेला ४-३ असा ऐतिहासिक विजय मिळवून दिला. (FIFA World Cup 2026)

हा विजय पॅराग्वेच्या विश्वचषक इतिहासातील सर्वात मोठ्या विजयांपैकी एक मानला जात आहे. विशेष म्हणजे, विश्वचषकाच्या बाद फेरीत पॅराग्वेने याआधीच्या पाच सामन्यांत एकही गोल केला नव्हता. २००२ मध्ये जर्मनीकडून १-० असा पराभव स्वीकारलेल्या पॅराग्वेने तब्बल २४ वर्षांनंतर त्याच जर्मनीला विश्वचषकातून बाहेर फेकत जुन्या पराभवाचा बदला घेतला. (FIFA World Cup 2026)

https://prahaar.in/2026/06/29/ind-vs-aus-indias-t20-world-cup-campaign-ends-after-defeat-to-australia-these-errors-proved-decisive/

दुसरीकडे, २०१४ मध्ये विश्वविजेतेपद पटकावल्यानंतर जर्मनीची ही आणखी एक निराशाजनक मोहीम ठरली. २०१८ आणि २०२२ नंतर यंदाही संघाला अपेक्षित कामगिरी करता आली नाही. यंदा बाद फेरीत प्रवेश करूनही जर्मनीला अखेरच्या ३२ संघांच्या फेरीतच गाशा गुंडाळावा लागला.

आता पॅराग्वेचा पुढील सामना फ्रान्स आणि स्वीडन यांच्यातील विजेत्या संघाविरुद्ध होण्याची शक्यता असून, उपांत्यपूर्व फेरीत आणखी एका बलाढ्य प्रतिस्पर्ध्याचे आव्हान त्यांच्यासमोर असणार आहे. (FIFA World Cup 2026)